AN ENOT NA SURAT
NI
SAN PABLO APÓSTOL
SA MAGNA
TAGA CORINTIOS.
CAPITULO I.
1. Si Pablo na inapod na apóstol ni Jesucristo sa cabótan nin Dios, asin si Sósthenes na tugang,
2 Sa Simbahan ó Iglesia nin Dios, na yaon sa Corinto, sa magña nagpacangbanal dian sa qui Cristo Jesús, na inaapod sindang magña santos ó banal, asin sa gabos na nagáarang can gñaran nin Cagurangnan tang Jesucristo sa sain man na lugar ó camugtacan, Cagurangnan ninda patin satuyá man:
3 An biyayá asin catoninogñan nin Dios Ama niato, patin nin Cagurangnan tang Jesucristo.
4 Nagpapasalamat aco sa Dios co nin daing pagyotong dahel sa saindo, huli can biyayá nin Dios na itinao sa saindo sa gñaran ni Cristo Jesús;
5 Na sa gabos na magña bagay anan camong pinacayaman dian sa saiya, sa gabos na pagtataram asin sa gabos na caisipan;
6 Siring sa pinatotoohan ni Cristo nangayod dian sa saindo:
7 Malá ta day mayo nin anoman na magcuculang sa saindo sa arin man na balaog, na naghahalat can capahayagan nin Caguranguan tang Jesucristo.
8 Na siya man papacarigonon camo sagcod sa catapusan, tagñaning magui camong day mayó nin caculagñan duman sa aldao nin Cagurangñan niatong Jesucristo.
