—Mga tulisan? Diri mahihimo! Nasiring nga mga kuwadrilyeros kontra han mga sibil. Salit aadto bilanggo hi D. Filipo.
—Sanctus Deus! nasiring nga kapin hin napulo kagupat an patay.
Pinanmuksan an iba pa nga tarangbuan ngan namagpanangbo in magkalainlain nga nawong nga naggihataghatag hin katalahuran ngan managhiniruhimangraw.
Dida han kapapaw'on han adlaw nga malinaway kinikita ha antaw in mga sundalo nga nagtitikadto, nagtitikanhi, nagsuslatsugat, baga in mga tabuhon nga lambong.
—Aadto na liwat in usa nga patay! — nasiring in usa nga tikang ha tangbuanan.
—Usa? duduha iton kinikita ko.
—Ako amo man... kundi, sabuot ko diri kamo maaram kun ano in nahanabo?-nagpakiana in usa katawo nga masuri an pangahimo.
—Amo na! an mga kuwadrilyeros.
—Diri; nagubot ha kuwartel!
—Ano nga nagubot? An padi kontra han alperes!
—Diri, diri ito amo, nagsiring an nagpakiana; an kainsikan kay nag-urugop pag-alsa. Ngan bumalik pagsada han iya tangbuanan.
—An kainsikan! — nagsarabat an ngatanan, duro an panhipausa.
—Ugaay daw waray hinkikit'an bisan usa!
—Naubos ada pagkamamatay.
—Nasiring pa gud ako nga may bubuhaton nga maraot. Kakulop...
—Inmabat la ako ngadaan. Kagab-i...
—Kanugon na!ngani Hermana Rufa; ano nga pagkamamatay nga diri pa Pasko, damo in ira padulong... Kun naghulat unta anay ngada han bag-o nga tuig...
Ha hinayhinay nagtikadamo an mga maglalakat; siyahan mga ayam la anay, manok, baktin ngan mga sarapati, an namagpasipara pagsudoy; sunod hini nga kamanampan, kabataan nga maghugaw, namamagturugway ngan nagkakahahadlok pagtiharani ha kuwartel; katapos mga lagas nga babayi, nanmiminangot hin panyo, nanmimitbit hin kuwintas nga bahol, nanmamasangil pangadi basi la papangagion han mga sundalo. Ha paghikit'i nga nahihimo ngayan in paglakat hin diri pinupusil, magkalusad man an kalala-
