balhin han himangraw nga nakakasamdong han nawong han masakit.
—An napatay diri nagkikinahanglan hin tambal; kamo an mahabibilin. Sidnga hi D. Crisostomo nga lauyon ako buwas kay may ada ko ha iya igsusumat nga kaudganan gud. Ha mga ikapira kaadlaw matalikod ako. An Filipinas nagsisisirom!
Hi D. Filipo, katima hin pira kadali nga pakigkayakan, linmakat, nagkukuriot ngan nabuot, didto han balay han masakit.
- Quiquid latet, aparebit.
- Nil inultum remanebit(1)
An lingganay nagtuktok han Ave Maria, ha kulop; han paghibatii han mga bagting nanhunong ngatanan, an tawo nabaya han iya mga buruhaton ngan natukas: an parauma nga tikang ha huron nahunong anay pagsaluma, napaukoy han inihap nga pitad han karabaw nga iya nasasakyan ngan mangadi; an kababayin'an nanngungudos ha butnga han dalan, nahutib an ira mga im-im basi waray magruhaduha han ira pagdiyos; an tawo napahuway anay han paghinapyod han iya manok ngan nangangadi han Angelus basi mamay-ada palad; ha sakob han mga balay dinadagko an tingog han pangadi... an ngatanan nga aringasa nga diri dara han Avemaria nawawara, nahauukoy.
Kundi an padi, waray tukas han kalo, nagtarap han kakalsadahan ngan nakaburaw han damo nga kalagasan nga kababayin'an ngan labi pa nga pakaburaw! kay sinmaka ha balay han alperes. An mga magdiniyuson nga ginang nangukoy han pangadi ngan manag-ihaharok han kamot han padi, kundi hi P. Salvi waray ha ira pag-asa; yana diri hiya naruruyag pagduon han iya mga tulanon nga kamot dida han irong han mga binunyagan, ngan katikang dida (sugad han hinkit’an ni Da. Consolacion) idinadayon pagpadalasdas ngadto han suso han gining nga nakaob pagharok. Paurudgon gud ada nga butang an nakakalibang ha iya nga iya hinngalimtan an iya turumanon ha iya la ngahaw ngan ha Santa Iglesia!
Matuod man gud, sinmaka hin dagmit ngan magtawag hin ikag dida ha hagdanan han alperes, ngan ini ginmuwa la-
