nagpapadara hin pisos ngadto ha singbahan pahanungod
hin misa ha pagpasalamat. Kundi dako an kan Kapitan Tiyago pagtahod han bana tungod han iya bantog nga lasgod ha pagbulong han bisan ano nga sakit ngan namamati gud hiya hin maupay han talagsa nga pulong nga ha inarikawot natitigayon hin pagluwas han ngual. Tungod hini ngan tungod pa liwat nga an doktor diri naalagad pag-laoy hin bisan la hino, sugad han iba nga mga mananambal, asya in pagpilia ha iya ni Kapitan Tiyago nga say magtambal han iya anak.
An mahatutungod han batan'on nga Linares, lain na ngahaw. Han nag-iinandam hira pag-igirikan ha Espanya, hi Da. Victorina nakahunahuna hin usa nga katsila nga bibilinon pagbantay han ira manggad kay diri natapod hin usa nga pilipino: an bana nahanumdom hin usa nga umangkon ha Madrid nga nagtutuon pagkaabogado ngan asya an baga labi nga may pagsabot han iya mga urupod: amo an ira ginsuratan pagpakadto, binaydan ngadaan an pasahi ha pagsakay, kundi han kapapas hadto nga mga inop pag-aan-hon pa kay nagsasakay na an batan'on.
Asya ini hira an tulo nga pagkatawo nga nagkaabot. Hamtang nananangka ha ikaduha nga pamahaw (29) sinmaka hi P. Salvi ngan kay magkiriglala na man hira, iginpakilala ha iya, han magtiayon lakip an mga kadungganan, an batan'on nga Linares nga baga nahakaawod.
Kaiya na gihapon hinmangrawan hi Maria Clara; an daraga nakadto napahuway ngan nakaturog. Hinmangrawan an ira paglakat; hi Da. Victorina pinmarayaw han iya katarabitaban, han iya pag-inantuson han mga panulos han mga probinsyanos, an mga payag nga pawod, an mga tulay nga kawayan, ngan waray hingalimti pagsumat han padi nga sangkay niya an Segundo Cabo, an Alcalde Kuan, an Oidor nga Hino la, an Intendente ug iba pa, mga tawo nga hagtaas in dungog ngan naghahatag ha iya hin katalahuran.
—Kun kasangkulop ka unta abot, Da. Victorina, — sinmiring hi Kapitan Tiyago han dalikyat nga paghunong, —iginkakakita ka unta dinhi kan S. E. an Capitan General: nakada hito dida lilingkod.
—Ha? ano? Nakanhi hi S. E.? dinhi ha imo balay! Buwa!
—Pagsusumatan ta ikaw nga nakada hito dida liling- kod! Kun kasangkulop ka unta abot..!
