— Uday, binmaton ini, an la . . . labi kama . . . maisog nga espiritu nga akon kilala amo an amonyako: an akon sangkay namulong hini ha re... retorika.
Tikang hadto kanunay an ginang magyakan, kun natatagan hin higayon, hin pagkasiring:
— Ako la in amonyako dinhi hini nga makauuyam nga tuna, ini ha retorika nga pamulong, siring pa han pulong ni Sr. N. de N., usa nga peninsular (27) nga may kategoriya.
An ngatanan nga iya yaknon kinahanglan nga hihimuon; nadadaog na gud niya an iya bana, ngan ini man liwat waray maghunahuna hin pagsupil, salit baga naginusa na la hiya nga ayam-ayam han iya asawa. Kun nauurit ha iya, diri hiya tinutugutan paglusad, ngan kun kinasisinahan gud hiya hin tuudtuod tinataluan hiya han kuhakuha nga ngipon ngan ginpapabay'an nga makaharadlok an dagway ha sulod hin usa o duha ba kaadlaw.
Nahanumdom hiya nga an iya bana kinahanglan magdoktor ha Medicina ngan Cirugia, salit iya ginsiring.
— Inday, karuyag mo nga pagdakpon ako?— nagpakiana an bana, nababaraka.
— Lurong ka gad man gud! binmaton;— pabay'i la ako; diri ka mananambal, kundi karuyag ko nga pagngaranan ka hin doktor, ngan hi ako man doktora! waray baribad!
Ngan han pagkabuwas kumarawat hi Rodoreda (28) hin sugo pagsurat ha itom nga marmol hinin masunod: DR. DE ESPADANA, ESPECIALISTA EN TODA CLASE DE ENFERMEDADES.
Ngan an mga suruguon ngatanan napirit hin paghatag ha ira nga duha han bag-o nga kadungganan, ngan tungod man liwat hini dinmugang man an mga patukbol, an dakmol han bukbok nga bugas ha bayhon, an mga laso ug mga engkahe, ngan dinmugang an panyubit han iya magpakaluluoy ug mga kablas nga igkasi nga nagpapaka-asawa hin diri sugad kahitaas nga pagkatawo han iya asawa. Ha ikinaadlaw isip niya nga nadugang la an iya dungog ug kahitaas, ngan kun madayon ini nga lakat, kahagos hin usa katuig tingali makasiring nga langitnon an iya tulin.
Kundi ini nga mga hagtaas nga panhunahuna diri nakakaulang nga magtidugang la an iya kalagas ug kawaray na angay. Ha ikinapakakita ha iya ni Kapitan Tiyago ngan paghihinumdom nga nagyaos la pagpinangulitawo ha iya,
