ruyagon, ngan dinhi ha kinabuhi diri la kay an mga salaan an nakakasuklat ha mata, kundi kay labi na nga gayod an mga buutan.
—Nakilala ka hiton akon mga kaaway?
Waray anay baton hi Elias, nagpipinamurubuot,
—Hinkilal'an ko in usa, an namatay, —binmaton.—Kagab-i ko hibarui nga may ada niya ha imo bubuhaton nga lain, tungod hin himangraw nira ngan hin usa nga tawo nga nawara la dida han kadam'an. Nasiring: "Diri na nga haw ini kakaunon hin isda sugad han iya amay; kikitaon mo na buwas." Ini nga mga pulong nakaaghat ha akon hin pamurubuot, diri la tungod han kahulugan kundi tungod man liwat han nagyakan nga may pipira na kaadlaw tikang napakadto han puno han mga panday pangaro nga katugutan hiya nga say magpalakat han mga buruhaton bahin ha pagbutang han siyahan nga bato, waray aro hin dako nga bayad ngan nagpakita nga may ada niya dako nga sinasabutan han buhat. Waray ko kinikita nga angay pagmatuuran nga hiya may tuyo nga maraot, kundi may ada la sinasantupan han akon hunahuna nga an akon mga tahap may kamatuuran, salit pinili ko adto nga uras ug adto nga lugar ha pagpasabot ha imo basi diri ka ha akon makagpinakiana. Kinita mo man kun ano an nahinabo.
Maiha na nga waray pagyayakan hi Elias kundi waray la gihapon babaton hi Ibarra; nagpipinamurubuot.
—Maraot nga namatay ito nga tawo! —nakasiring, katapos; nasasayod unta kita dida ha iya hin iba pa.
—Kun nabuhi nakakalusot unta dida han nakurog nga kamot han buta nga paghukom han tawo. An Dios an nagbuot, an Dios an pinmatay ha iya, an Dios la an matuod nga hukom!
Hi Crisostomo nagkinita anay hadto nga tawo nga sugad hini an pamulong ngan nakakita han magbakod nga mga butkon nga pilaspilas ngan nanhuhupong.
—Natuod ka liwat nga may milagro? nagsiring, naghihipahiyom;-kitaa ito nga sinisiring han bungto nga milagro!
—Kun tumuod ako hin mga milagro sugad ako hin diri natuod han Dios: sugad ako hin natuod hin usa nga tawo nga gindidiyos, —binmaton hin tinuod; —kundi natuod ako ha Iya; nakadamo ko na abata an iya kamot. Han paghirun-og han ngatanan, nga haros gugub'on an ngatanan
