Kundi kinalasan hiya han pakakita han maping-it ug diri masupat nga panagway ni Elias.
—Ginluwas mo ako ha kakurian, —nagyakan hin tinag-alog(1) han pag-abat han kiwa ni Ibarra, —nagbayad la ako ha imo hin katunga han akon utang, salit waray mo sadang ha akon pagpasalamatan. Nakanhi la ako pangaro ha imo, kun masasadang...
—Siring labinmaton an batan'on hin sugad ngahaw nga yinaknan, dapit kinalasan han waray tawatawa nga lihok han umanhon.
Hi Elias sinmiplat han mga mata ni Ibarra nadaliay ngan sumiring:
—Kun an buta nga hukmanan han mga tawo maruyag na pagtukib hini nga surupaton nga kasugad, ipinanga-ngamaya ko ha imo nga diri ka magsumat bisan kanay han ihinuring ko ha imo didto ha singbahan.
—Ayaw kabaraka, binmaton an batan'on, dara in gutiay nga kabudlay ha buot; —maaram ako nga ginbibiling ka han mga punuan, kundi diri ako tiktik.
—A, diri tungod ha akon, diri tungod ha akon! mulong hin tigda hi Elias nga dapit nahaubos; —tungod ha imo; ako, diri ako nahadlok han mga tawo.
Dinmugang an paghitingala han batan'on: an tingog hadto nga tawo, nga siyahan paraulin, baga lain ngan dapit diri kinaiya han sugad ha iya nga kahimtang.
—Diri surulpaton inin akon mga pulong, gintatalinguha ko in pag-asoy hin mahayag. Basi makagtagam ka hin maupay kinahanglan nga pakasidngon ka nira nga waray mo kalibutan, ngan hira an imo mga kaaway, tumapod.
Hi Ibarra inmisol.
—Mga kaaway? May ada ko mga kaaway?
—Kita ngatanan may ada, senyor, tikang ha gigutiayi nga mananap ngada han tawo, tikang didto han kablas ngada han manggaran ug gamhanan! An kamay-ada kaaway kabutang han kinahuhi!
—Diri ka kay paraulin la, diri man liwat parauma!...—nagmugo.
—May mga kaaway ka ha kahigtaasan sugad man ha ubos,(2) —nagpadayon hi Elias waray pagtagad han mga pulong han batan'on; —dako nga buhat iton imo inaatubang, may ada mo gin-agian, an imo amay, an imo apoy ngaduha na may mga kaaway tungod kay na may mga ka-
