pilipinhon nga nanunul-ot hin tinaga-Europa an iba, an iba man kinalugaringon. Nagkakasarusalakot na la, nagpapatirutikwang an mga suruguon nga namamagdara hin karne ngan hin manok, mga magturuon nga busag an pamanapton, kalalakin'an ug kababayin'an nga haros ipanhihisabod han mga sarakyan nga an tuman la nga nagpapakaagi, bisan duro an guliat hin "tabi!" (") han kotsero.
Ha tungod han balay ni Kapitan Basilio may mga batan'on nga namaglabot han aton mga kilala ngan nag-abiabi ha ira hin paghapit anay. An marayhak nga tingog ni Sinang, nga linmusad ngadto ha ira, asya in nakautod han ngatanan nga pamaribad.
— Saka kamo anay madaliay basi ako makaupod ha iyo, — nasiring. — Ginugul'an na ako pakig-inatubang hin diri ko mga kilala ngan waray iba nga himangrawon kun diri manok la ngan baraha.
Nagkasaka.
An ruwang puno hin tawo. May nanaop paghatag hin katahod kan Ibarra kay an iya ngaran kilala han ngatanan; namagkinulaw hin panhipausa han kamahusay ni Maria Clara ngan an pira nga kalagasan nga mga ginang namagmugo, sakot han ira gupa, hin: "Baga an Birhen!"
Didto nanginom hira hin sikulate. Hi Kapitan Basilio naginhinasa nga sangkay ug nagintumarabag ni Ibarra tikang la han ira pagkatirok didto ha salog. Nasayod hiya didto han telegrama nga ihinatag han iya anak, hi Sinang, nga an ira kalipungan gindag'an ni Ibarra, salit, dapit diri niya pagpalupig hin kamaupay in kaburut'on, ginbawi niya an ginkahumanan nira hadto didto han uyag han ahedres. Kundi, tungod kay diri man karuyag ni Ibarra, iginsaad niya nga an iya baraydan hin kostas igsusuhol niya hin usa nga magturutdo dida han bag-o nga liburan han bungto. Tungod hini, ginamit niya an iya kabantog nga maupay mamulong ha pagsiring han iba nga may kalipungan ha iya nga diri na la managpadayon han ira karuyag pagkalipunganan, kay nasiring hiya:
— Tuod la kamo; ha mga kalipungan, an nagdadaog nawawarayan panapton! (6)
Kundi waray ha iya natuod bisan pa say niya iginpapananglit an mga romanos.
Katima nira panginom hin sikulate, an aton mga ba-
