ngatanan......Labot pa, karuyag ko nga magkaupay kamo ngani hi P. Damaso.
—May ada gad la gihapon hito panahon! binmaton hi Ibarra nga nahapapahiyom hin pinirit ngan bumuhat pagupod han kadaragan'an.
Nagkalusad hira.
Hi Maria Clara ginbubutnga nira Victoria ngan hi Iday, hi Dada Isabel nabunyog didi ha luyo. An mga tawo magtinahuron, nagbubuhag pagpaagi ha ira. Hi Maria Clara haros diri mabuslong han kamahusay; an iya duas nawara, ngan bisan kun an iya mata baga magsamdungon, an iya baba baga waray iba nga nahihimo kun diri paghiyom. Tungod han kamakiaangayon, han pagkabatan'on nga daraga nga malipayon, nakikigkalabot hiya han iya mga kasangkayan ha pagkabata pa nga yana magdinayawon na han iya malipayon nga pagkabatan'on. Ha sulod hin kulang hin napulo kaglima kaadlaw binmalik ha iya an iya kamahuyayag, an binata nga pakigkarukayakan nga baga nawara didto ha sakob han mga kuta han beaterio: sugad han alibangbang nga ha pagbulag didto han kakanog nangingilala dayon han mga bukad; igo la in usa kadali nga paglupadlupad ha kaadlawan ngan magin-alibangbang nga tuudtuod. An iya bag-o nga pagkahimtang inaabat ha iya bug-os nga lawas: ngatanan iya pinakakamaupay ug pinakakamahusay; iginpapahayag niya an iya paghigugma ha uray nga pangiwakiwa nga waray nahihimo kundi magtahom la nga panhunahuna ngan diri nakilala han waray katungaydan nga paghikaawod. Matuod danay niya tabunan an iya bayhon han iya abaniko kun pinababati hin mga pataraw'an, kundi dida hini nahiyom an iya mga mata ngan in usa nga dalikyat nga pamantad nakakaluob han iya lawas.
Nagtitikang na an kabalayan hin panagkot han mga suga ngan didto ha kadalanan nga gin-aagian han musika pinanmaruktan an mga surugaan nga kawayan ug kahoy sinubad han mga binitay nga aranya didto ha singbanga han.
Tikang didto ha tuna kinikita dida han mga bintana an kiot han mga tawo ha sakob han balay, ha butnga hin mga kapaw'an ug hin maghamot nga alimyon hin mga bukad ngan hin mga tunog hin piyano, harpa kun orkesta man. Nagbabalag ha dalan an kainsikan, kakatsilaan, mga
