mga hakaraon nga tikang ha Europa, nga diri ngani nira matitilawan bisan la magutiay. An ira mga lamisa mga puno hin kakanon.
Ha butnga may ada usa nga hinimo nga dako nga pinya nga maupay an kasubad, nga asya an pinanunulbukan han mga ipaniril-at nga pinanhimo hin magpakaruruyag nga kahimo han mga binilanggo ha panahon nga ira ipinapahuway. May baga in iparaypay, may baga in urapong nga bukad, usa nga tamsi, usa nga rosa, usa nga dahon hin anahaw kun usa man nga talikara, ngatanan ini bug-os la, waray sinumpayan: an maghirimo asya in usa nga bilanggo, an iya garamiton asya in usa nga amol nga sipol ngan an iya surundanan asya an tingog han magbarantay. Ha magkaluyo hini nga pinya nga ginngangaranan nga palillera, ipinanmumutang in mga prutera nga mga puno hin mga pinundok nga mga naranghita, bubuwa, atis, tsiko ngan pati ngani mangga, bisan la kun Nobyembre. Ha sunod, ibinubutang ha haglapad nga bandihado, nga hinanigan hin mga linuhuluho nga papel nga magkalainlain an tina, may mga hamon ha Europa, ha China, may pastel nga dako nga dagway hin usa nga Agnus Dei, kun sarapati man, tingali asya an Espiritu Santo, mga pabo nga relyeno ug iba pa, ngan sakot hini ngatanan an mga makaaraghat hin pagkaon nga mga atsar (1) nga magpakaruruyag pagkit'on an kahimo, mga bukad hin bunga ug iba pa nga utanon ug mga bunga hin kahoy nga pinamagtabastabas hin magkalainlain nga hitsura ngan ipapanukot hin arnibal didto ha sakob han mga garrapon.
Pinanmaspasan in mga lubo nga salaming nga mga kabilin pa han kaaapuyan; pinapanginggat an mga baklaw nga tumbaga; pinanmumuksan han ira pula nga tabon in mga kingke nga lalanhan hin petrolyo, nga ha sulod han tuig nga waray gamit pinananabunan basi diri paghugawan han mga namok ug mga langaw; an mga mitaybitay nga salaming, nga mga kinantukanto, namamag-aruabyog, namamag-irintok, may hinyagingying, daw nangingirog man hin kalipay, namamag-iringgat ngan nagpapadamo han silaw, ngan ira isinusulhog ngadto han mabusag nga puto an mga tina han balangaw. An kabataan nag-uurugyag, nagkakalilipay, nanlalanat han mag-inggat nga sulhog, nanhihisalaki, nagkakabubuong an mga tubo, kundi ini ngatanan diri nakaka-ulang han kaadlawan: ha lain nga panahon iba unta
