tawo asya an paghikit'i hin kapin hin duha nga suga didto
ha kombento kun mga gab-i nga aadto hiya namimisita ha
lain nga balay . . . didto kanda Maria Clara!! An mga magpakidiyos nga kababayin'an nangungudos kun nagkakasasayod ngan nagpapadayon panaglinibak.
Hi Juan Crisostomo Ibarra nagtelegrama tikang didto ha Kabesera paghatag hin katalahuran kanda Dada Isabel ngan han iya umangkon han ira pag-abot, kundi waray pagsumat kun ano an hinungdan nga waray hiya didto ha San Diego. Damo an nasiring nga nabilanggo tungod han binuhat niya kan P. Salvi hadton kulop han adlaw han Todos los Santos; kundi dinmugang an hiruhimangraw han paghikit'i ha iya han pagkakulop han ikatulo kaadlaw. nga nahawas dida hin usa nga sarakyan ha tungod han balay han iya pinangangasawa ngan naghatag hin maupay nga katalahuran han padi nga tikadto man panungbalay.
Kan Sisa ug han iya mga anak waray na may nahanunumdom.
Kun yana makadto kita ha balay ni Maria Clara, usa nga daw makaruruyag nga salag, nga nabubutnga hin mga aslom ug burak, hiaabutan ta pa didto an duha nga ba tan'on nga nananangbo didto hin usa nga tangbuanan nga dapit ha danaw. Adto didto natatahuban hin mga bukad ug mga balagon nga nangangapyot ha mga kawayan ug mga kawad ngan nagpapasarang han ira talagudti nga hamot.
An ira mga im-im naghihinutibhutib hin mga pulong, mga pulong nga maghumok pa han hinagusihis han mga dahon ngan maghamot pa han hangin nga luob hin alimyon hin bukad nga naguop han tanaman. Asya adto an uras nga an mga kataw didto ha danaw, dara han pagpahimulos han lindong han kakurulpon nga naglalabay, maglipayon, nanngungutwal ha bawbaw han mga balod pagsaurog ngan pagpagikan hin mga awit han adlaw nga nagtitikasalop. Nasiring nga an ira mga mata ug mga buhok magtagom ngan sinabngan an ira ulo hin mga bukad ha tubig, nga magbusag ug magpula; nasiring nga usahay inaabat dida han mga bura an ira mga lawas nga magpakaruruyag, magbusag pa han mao nga bura, ngan kun nagagab-i na tinitikangan nira an ira mga katingalahan nga mga uyag ngan dida pinanhihibatian in mga arangay nga tunog hin harpa; nasiring liwat . . . kundi ibalik ta ngadto han aton duduha nga batan'on ngan pamatii ta an katapusan han ira himangraw. Hi Ibarra nasiring kan Maria Clara:
