gasan—pinangangaro ko; siyahan, upat nga ermano mayor (9) ha sulod hiton duha kaadlaw nga pyesta, ngan ikaduha, nga ha ikinaadlaw ipanlabog ha danaw in 200 nga
piniritos nga ugang, 100 nga kapon nga relyeno ngan 50
nga inasal, sugad han binuhat ni Sila, kadungan ni Ciceron
nga hinnanabihan pa la
yana ni Kapitan Basilio.
―Asya, sugad kan Sila! ―sinmumpay hi Kapitan Basilio, hinayunan. An panhipausa nagtitikadugang. ― Tungod kay magpapakanhi an kadam'an nga tawo nga mga salapian ngan tagsa ha ira magdadara hin tinagyukot kapisos ngan han ira mag-upay nga mga manok, ngan hin liyampo (10) ngan hin baraha, pinangangaro ko in nanapulo kaglima kaadlaw nga bulang ngan an bisan hino makagbukas ngatanan hin balay nga pasusgalan . . .
Kundi an mga batan'on namagkabuhat pagpugong ha iya nagpapakasiring nga an tenyente mayor nabubuang na. An kalagasan nakigbari la hin dila.
—Ngan ha katapusan, basi diri ta hingalimtan an mga kalipayan han kalag. . .
An mga ngurutob ngan han mga guliat nga nadungog ha ngatanan nga piliw han ruwang nakaliga han iya tingog! diri na adto iba kundi usa na nga aringasa.
—Diri!— ginmuliat in usa nga diri napabaribad nga konserbador; ―diri ko karuyag nga dayawon nga say naghimo han pyesta, diri! Papagyakana ako, papagyakana ako!
—Ginlimbungan kita ni D. Filipo nasiring man an mga liberal, diri kami mauyon! Binmalhin hiya ngadto han kalagasan! Ayaw kita uyon!
An gobernadorsilyo nga dinmugang hin kamasulub'on waray pananalinguha paghusay hadto nga kasamok: naghuhulat na la nga say hira in maghusay.
An kapitan han mga kwadrilyeros nangaro nga makagyakan; tinugutan, kundi waray pakabungat han baba salit binmalik na la liwat paglingkod, napihaw ngan nahakakaalo.
Iginkapalad nga binmaton hi Kapitan Valentin, an labi kamainalagyamon han mga konserbadores, ngan nagyakan:
—Diri kami makakahimo hin pagtugot han pinangangaro han tenyente mayor (11) tungod kay hinlalasngan. Kadam'an nga mga paburuthon ngan kadam'an nga mga gab-i nga igkokomedya angay la ito hin usa nga batan'on pa, sugad han tenyente mayor, nga makakahimo pa paginagma hin kadam'an nga gab-i ngan makakahimo hin pa-
