but’an kundi naglulugaring, basi ha ano nga kahimtang, ha mga katadungan, ha pamatasan, ha pinulungan, an katsila diri makasiring nga iya ini balay, ngan diri pakasidngon han bungto nga kasitaga-nasod, kundi sinmalakay, iba nga tawo, ngan maiha, magdali, masasangpot an katalwasan. Amo ini kay ano nga karuyag ko nga mabuhi ka.
Hi Basilio ginminhawa daw sugad hin napalusan hin kinawo nga mabug-at, ngan binmaton kahagos hin usa kadali:
—Senyor, an dungog nga imo iginhahatag ha akon, han pagtapuran mo ha akon han imo mga panhunahuna, uraura hin kadako nga nakakapirit ha akon hin pagsumat ha imo hin huyayag nga ito nga inuungara mo ha akon labaw kaupay han akon mga kusog. Diri ako naasa han politika, ngan kun nagpirma ako han surat pangaro nga itugot an pagtutdo han kinatsila tungod la kay dida kinita ko an kaupayan han pag-aradman, amo la. An akon turon lain, an akon hingyap amo la an pagtambal han mga sakit ha lawas han mga bungtuhanon.
An alahero nahapahiyom.
—Ano an dagway han mga sakit han lawas kun itanding han mga sakit han kalag?—nagpakiana.—Ano an kamatayon han tawo kun itanding han kamatayon hin usa nga bungto? Mga sano nga adlaw bangin ka maginbantugan nga mananambal kun tugutan ka panambal hin waray samok; kundi labi nga magiginbantugan an tawo nga makahatag hin bag-o nga kmabuhi hini nga bungto nga naghihimatay. Ikaw, ano an imo binubuhat basi ha kaupayan hini nga tuna nga imo natawuhan, nga naghatag ha imo hm kinabuhi ngan naghatag hin higayon nga habaro ka? Diri ka maaram nga waray himurulsan an kinabuhi kun diri iginpapahaungod pagsangpot hin usa nga dako nga tahnguha? Baga la in usa nga pinit nga bato nga nawawagtang dida ha kapatagan kay waray hitampo didto han kahimuan hin usa nga balay.
—Diri; diri, senyor,—binmaton hi Basilio hin ubos la nga tingog.—Diri ako kay nagkikinugos la han akon kamot; nagguguol ako sugad han pagguol han ngatanan basi matindog, dida han mga kagub’an han nag-agi, in usa nga bungto nga an tagsa nga tawo mangangalinsakob ngan mabati ug maugop han mga pagbati ug kinabuhi han kasahiran. Kundi, bisan madako an ka-
