nga diri kamo tinatagan! Ngan bisan pa kamo tagan, magigin-ano kamo? Ano in iyo makukuha? Kun maghikaupay, magigintuna kamo hin mga paglaladngan, nasod hin mga kagubot, republika hin mga paragbuutan ngan mga di-hiayunan sugad hin pipira nga republika ha Sur-Amerika! Ano nga maghihingyap kamo hin pagtutdo han kinatsila, usa nga talinguha nga makaarawod kun diri lugaring said hin aabutan nga mga karat’an? Karuyag niyo dugangan hin usa pa nga yinaknan an may kapin na hin kap’atan nga mga yinaknan dinhi hini nga kapurupud’an basi labi nga diri na magkasarabot?...
—Diri gad man,—binmaton hi Basilio;—kun an paghibaro han kinatsila diri ha amon makakapakigkaurusa han Pamunuan, makakag-urusa han ngatanan nga puro!
—Sayop nga dako!—inutod ni Simoun;—napapagsinumat la kamo hin mga hagtaas nga pulong ngan diri kamo nasantop han sag-od han mga butang basi niyo matukib kun ano an katapusan nga aabutan hito nga talinguha. An kinatsila diri manta magiginyinaknan nga kasahiran dinhi hini nga tuna, an bungto diri manta hito magyayakan kay ha mga pagpalakat han iya panhunahuna ngan han mga pagbati han iya kasingkasing waray pulong ito nga yinaknan; an tagsa nga bungto may kalugaringon nga yinaknan tungod kay may kalugaringon nga pagbati. Ano iyo pagpupulsan han kinat sila, kamo iton pipira nga manhihibaro pagyakan? An pagpatay han kinaiya niyo nga panhunahuna, pagpasakop han iyo kaburut’on han iba nga kaladnganan, ngan hingan angay kunta kamo maglugaring hin pamatasan, mauuripon lugod kamo nga tuudtuod! Sisiyam dida hiton tagsa kanapulo ha iyo nga nagpapka-ilustrado, mga tawo nga tinmalikod han tuna nga natawhan. Dida hiton iyo ihap, an tawo nga nagyayakan hito nga yinaknan, nabaya han lugaringon nga pinulungan nga diri na ngani hinbabaruan hin pagsurat sugad man hin pagsabot, ngan pira na in akon hinkit’an nga diri na nagpapakamaaram hin bisan usa kapulong! Palaran lugaring kay inin iyo Pamunuan lurong. Hamtang an Polonia, nga basi mauripon han Rusia ginbubut’an nga mag-aram han ruso, hamtang an Alemania nagdidiri han pranses nga yinaknan dida han mga lalawigan nga ira nakuha, inin iyo Pamunuan nangangarit nga kamo mag-
