An kadaragan'an ni Orenda nagdurungan paglingi ngadto kan Isagani; hi Isagani hinmiyom waray aringasa.
-Tago ikaw!-ginsiring ni Kapitana Loleng; bangin ka pagbutangbutangan... tago!
Hi Isagani hinmiyom liwát ngan waray bumatón.
-Hi don Timoteo,-nagpadayon hi Chichoy,―diri maaram kun hino an nagpasipara; hiyá amo an nagpalakát han mga buruhaton, hiyá ngan hi iya amigo Simoun, ngan waray na ibá. Naribók an bug-os nga panimaláy, napakadto an tenyente han Veterana, ngan katima pagtugon ha ngatanán nga hilumon la adto pinalakát ako.Kundi....
-Kundi... Kundi...-nangahás hi Momoy ikinukurog
-Agi daw! nagsiring hi Sensia nga nagkikinita han iya konsuylo ngan ikinurog man liwát han paghinumdom nga nahangadto han panagtawo;-ini nga senyorito Kun daw nagbutó....
-Waray nahasasalin nga buhi han bug-os nga kalsada ha Anloague! -Sinmumpay hi Kapitan Toringgoy nga napakalalaki ngan daw waray kaalantad ha atubangan han iya mga sakop ha panimaláy.
-Inmuli ako dará in kakulba, nagpadayon hi Chichoy, han pagdinumdom ko nga bisan la usa nga agpod. usa nga sigarilyo, nga nahulog o nahuwad in usa nga kingke, yaná nga uras waráy kita Heneral, bisan Arsobispo, bisan anó, bisan la mga empleados! Ngatanán an nakadto kagab-i han panagtawo nadudugmok!
-Birhen Santisima! Ini nga senyorito....
-Susmaryosep!-nakasiríng hi Kapitana Loleng; —ngatanán han nagpapakautang ha aton nakadto, susmaryosep! Ngan didá ha haraní may adá naton tuna ngan baláy! Hino daw la an....?
-Yaná hibabaruán niyo,--namulong hi Chichoy hin gutiay nga tingog,-kundi kinahanglan nga diri kamo magyinakan. Yaná nga kulóp iginkita ako hin usa nga sangkay, eskribyente didto hin usa nga opisina, hinmangrawán namon iní nga hinabó ngan ginsumatán ako niya han kamatuuran: iya hinbaruán didá han mga empleados.... An iyo hunahuna, hino an nagbutáng hadto nga mga sinako nga pulbura?
An kadam'an namagpakuró han sugbong; hi Kapitán Toringgoy la an sinmiplat hin liparo kan Isagani.
