ngadto ha bukid ngan namagsaad nga ma-bulós hirá
hitó nga katsila nga nakaduhá na ha ira pagbinuwa.
Hirá, an mga kawatán nga pinanhidakpan, nag-isip hin
pagpatigayon hin ira la ngan ira sinulong an quinta
nga ira iginkita ba gilayón, ngan nagsaad hirá nga ira
ihahatag an duha han tulo kabahin han katsila nga ubanon kun magkinahanglan.
Tungod kay an mga tigaman nga igin-asoy iginkakatukma kan Simoun, an asoy ginhunahuna nga diri sadáng tuuron ngan an kawatán pinapag-antos han ngatanán nga darahog lakip an pagpaagii hin makina elektrika, tungód hadto nga pagpakaalo. Kundi, an notisya tungód han kawará ni Simoun nga nakaburaw han bug-os nga Escolta, ngan labot pa, hin-agián in mga sinako nga pulburá ngan hin damo nga kinaratsutso nga balá didto ha iya baláy, an asoy nga may sinisilhagán nga kamatuuran, ngan nagtikáng an surupaton hin hinayhinay pagluób han ngatanan, pagputós hin mga burong, nagtikáng an mga huringhuring, may mga igham, mga paniplat nga kahihirutan, mga pabang-aw ngan mga pulong nga waray kahulugán. An mga daan sayod waray pagmamatuod, nanhahaglaba an nawóng ha panhipausa, pinamamagduas hin kahadlok ngan gutiay may magkatutuyaw han panhibukwati hin mga butang nga hadto waray la nira hiaabatí.
-Harumamay la itó kun nanhiunong kita! Hino ba in makakasiring..
Han pagkakulóp hi Ben Zayb, punó hin rebolber an mga bursa, napakadto kan Don Custodio ngan iya ini inabután nga nagduduro hin trabaho hin usa nga proyekto kontra han mga alahero nga Amerikano. Hinhuring ha talinga han peryodista hin tingog nga gutiayay ngan ha butnga pa han duhá nga palad han kamót, hin mga pulong nga surupaton.
-Balitaw?-nagpakiana hi Ben Zayb, kinmuot dayon han iya mga bursa han duhá nga kamót, hamtang inaabat an pamuság ha nawóng.
-Ngan bisan diín igkita..
Tinapusan an pulong hin usa nga mimika nga sarabuton. Inalsa an duhá nga butkon ha tungod han bayhon, an too pinipikó, an wala unát, an mga palad pinatatamod ha salóg, pinipiyong in usa nga matá ngan pumitad hin tipadangán.
--Pst, pst! sinmitsit.
