mga padi han tagsa niyo nga bungto haros ngatanan mga klerigo nga indiyo, nakasiring ako: inin mga prayle nakikigdurudlong makagkura la ngan inin mga pransiskano nag-aagwanta han gikakablasi nga bungto, salit kun inin mga dominiko ngan pransiskano tinmubyan ha mga klerigo han pagkapadi ha iyo lalawigan tungod tingali kay dida kulang hin salapi. Kun sugad, tana kamo, mga kaginuuhan, manginginom kita hin serbesa ngan igpapahanungod ta han kauswagan han iyo lalawigan!
An mga batan’on namagpasalamat ngan nanmaribad nga diri hira nanginginom hin serbesa.
—Nagsasayop kamo,—nagmugo hi Simoun nga, inabat, napipihawan; —an serbesa maupay ha ginhawa, ngan nakabati ako yana nga aga kan P. Camorra nga an kawaray isog han mga tawo dida hini nga tuna tungod kay puro la tubig an gin-iininom.
—Ada ta, sidnga hi P. Camorra, —dinmalidali pagbaton hi Basilio, siniko anay hi Isagani; —sidnga nga kun mag-ininom la kunta hiya hin tubig, diri hin bino o serbesa, tingali magmauruupay an aton kamutangan ngan diri kita unta paglilinibakon.
—Ngan sidnga,—dinugngan ni Isagani, waray pagaasa han mga siko ha iya han iya sangkay; —nga an tubig matam-is ngan waray maraot ha baba, kundi nakakalasaw han bino ngan han serbesa ngan napatay han kalayo; ngan kun ginlalaso nahihimo nga alisngaw, ngan kun gin-kukutaw nagiginmabalod nga kadagatan ngan nakausa pinmuo han katawuhan ngan nakapakurog han kalibutan!
Hi Simoun hinmangad han ulo ngan bisan kun an iya mga paniplat diri nakikita kay natatahuban han iya salaming nga matagom, an bahin han iya nawong nakagpakita nga hiya nahatitingala. —Mahusay nga baton! —nagsiring; —nahadlok ako nga mag-inintrimis la ngan magpakiana kun sano an tubig magigin-alisngaw ngan sano magiginmabalod nga kadagatan. Hi P. Camorra baga diri matinuuron ngan mabadyangas.
—'Kun pagdangdangon han kalayo; kun an talagudti nga mga sapa nga yana nagsasarang ha mga tingkuba nga umpas, kun igtikwang han maraot nga palad ngan matirok didto hiton kahiladman nga ginhihinunggad han mga tawo,—binmaton hi Isagani.
