nga panahón an Iróy nga Tuna mawawad'an hin damo
nga mga unob nga kadapig!
An gab-i nagtitidangán hin hinayhinay ngan naduyog man pagtidugang an kasamdong didto ha sakób han kasingkasing han batan'on nga haros nawad'an hin paglaom nga igkakita kan Paulita. An mga magparasyada nagtitikaibán hin hinayhinay didá ha Malecon kay nagpapakadto ha Luneta' nga tinitikangan hin mga tunóg hin musika nga dará han dalagan han mahalayahay nga harupoy han kakurulpon; an mga marinero didá hin usa nga buque de guerra nga nahaduduong ha salóg, namamagburuhaton ugsa masidman han gab-i, namamagsaká han mga pisi, magpiskay daw nga titibaráw; an mga sakayán nagtitikáng panagkot han ira mga lawag pagpakita nga may tawo, ngan an baybayon;
- May mamingaw nga ngurob ha baybayon,
- An hangin han balód nagpapaypayon
- Ngan nakanap, malatos kay paayon.
sugad han pulong ni Alaejos, napausbok didto ha hirayo
hin manipis nga alisngaw nga didá han pawa han bulan,
nga yaná kadayaw, nagiginmasilhag ngan makatitingala
nga ingkahe...
Binati in hunughunog tikang ha hirayo, hunughunog nga nagtitikaharani; hi Isagani linmingi ngan an iya kasingkasing nagtikáng hin pagputók hin makusóg; nagtitidaóp in usa nga kotse nga dinanas hin duhá nga kabayo nga buság, an mga kabayo nga buság nga nalutód didá hin usa kagatos kayukót nga kabayo. Sakay han kotse hira Paulita, donya Victorina ngan han sangkay nga ira upód kagab-i.
Ugsa an batan'on makahimo hin usá nga pitád, hi Paulita nalukso na ha tuna lakip an iya laksi nga daw kanán silfide ngan nakikitawá kan Isagani hin tawá nga punó hin pakigpasaylo; hi Isagani nahiyom man liwat ngan bagá sugad hin an ngatanán nga dag-om, an ngatanán nga magsubó nga panhunahuna nga ha iya nagdudumót, nagpapas sugad hin asó; an langit may mga silaw, an hangin may mga awit, ngan an kabanwaan ha dalan natatahuban hin mga bukád. Maraot nga palad kay nakadá hi donya Victorina, hi donya Victorina nga dinmaop han batan'on pangaro hin notisya bahín kan don Tiburcio. Hi Isagani nakagsaad nga iya bibilngon an tinataguan kay makikialayon han iya kilala nga mga estudyantes.
