—Psh!—nasiring hi Ben Zayb,—ngatanan waray bali bisan mausa kaguti, waray ha ira hino man nga artista.
Hi Ben Zayb amo an masuson nga manunurat dida ha El Grito de la Integridad, ngan an iya pamahungpahong nga kanan waray hiaayuni nakakapahalapad han iya papel ha mga mata hadton nag-iilob la hin bisan ano.
—Hi Serpolette waray tingog, hi Germaine waray angay, ngan adto diri musika, diri arte ngan diri ano la!—tinapusan hin dako nga pakatamay.
Basi in usa pakasidngon nga dako na nga critico waray na masugad han pagpakita nga diri hin-aayunan hin bisan ano. An empresa nagpadara hin duha la nga tiket ngadto ha Panuratan.
Didto han mga magkirita maghinpakiana kun hino an tag-iya han palko nga basiyo. Amo in nalabaw hin ka-chic ha ngatanan kay amo gud an mauurhi pag-abot.
Kun diin la adto pagtikang nga hurob nga iginkasumatsumat, nasiring nga an palko kan Simoun kuno. Kinita nga matuod. Waray may nakakita hadto nga tawo ha mga butakas, sugad man ha panliliwanan, ngan ha bisan la diin.
—Kundi yana nga kulop hinkit’an ko nga mag-upod ngan hi Mr. Jouy!—nagsiring in usa.
—Nagregalo hin usa nga kolyar ha usa han mga actrices...
—Hino ha ira?—nagpakiana in pira nga mga senyoras nga mga usyusa.
—An gimaupayi ha ira ngatanan, an nagkikinita kun ngain an paniplat ni Su Excelencia!
Mga paniplat nga may sinasabutan, mga kiro, mga pagruhaduha, mga pagkauruyon, mga haglipot nga yakan ug pagkasunudsunod.
—Nagpapaka-konde de Monte-Cristo!— nagsiring in usa nga napaka-literata.
—O paradulong hin katigayunan ngadto han Hadianon nga Balay!—sinmumpay in usa nga nag-aaring ngan nangangabugho kan Simoun.
Didto han palko han mga estudyantes nahabilin hira Pecson, Sandoval ngan Isagani. Hi Tadeo napakadto paglibang kan don Custodio, pinakihimangrawan han iya proyekto nga ayon, hamtang hi Makaraig napakadto pakighimangraw kan Pepay.
—Waray, sugad han siring ko na ha imo, amigo Isa-
