nanguraura. Salamat na la kay hi don Custodio amo an nagngaran han sakit ngan tungod kay nahadlok nga pagkinulawan hiyá han kadam'am, waray pag-asá han mga yawyaw ngan nagpasangil la nga nagsisinurat han iya susón han paguwá.
-Kun diri la tungod kay upód ta kamó,-nasiring hi Juanito nagpanlitoklitók an tawutawó sugad hitón kanán munyeka mga mata. Ngan basi mahasubád kaupay, danay pa padiwalon an dila.
Hadto nga gab-i naginbantugan hiya nga maisog ha mga matá ni donya Victorina, ngan dungganan, ngan an donya natibway gud ha sakób han iya dughan hin pagpakasál kan Juanito kun mamatáy hi don Tiburcio.
Hi Paulita nagtitidugang la hin kamasulub'on han pagpinamurubuót kay ano nga itón pipirá nga kababayin'an nga sinisiring nga mga cochers asáy nalilibangán ni Isagani. Cochers hinnunumdumán niya nga amo in usa nga pulong nga luluwason han mga kolehiyalas ha pagasoy han ira mga pagkaruyag.
Natima gihapon an primer acto ngan an marques say nakadará kanda Serpolette ngan Germaine nga mga suruguon nga babayi, an susgaranan hin awdanon nga kamahusay didá han troupe, ngan han budol nga Grenicheux hin kakotsero. Mga parakpakay nakapabalik ha ira ha paguwaan nagkakaragpot adto nga, diri pa la maiha nagpaparaglanat ngan nagpasurusumbagay, sinmaludo dinhi, sinmaludo didto, han mga elegante nga manilan'on, ngan nakigsiplatay hin may kahulugán hin damo nga mga magkirita.
Hamtang nagugulóng hin dalikyat tungód han sulatsugat han mga tawo tikadto han panliliwanan pagpahalipay han mga artistas ngan tikadto han mga palko paghatag hin pakiangay han mga senyoras, an ibá naghihiruhimangraw mahatungód han paguwá ngan han mga artistas.
-Waray ruhaduha hi La Serpolette amo an maupay ha ira ngatanán,-nasiring in usa nga nagpapakamaaram.
-Mauruupáy ko hi Germaine, mabuláw nga makaruruyag.
-Waray tingog!
-Ano man akon hiton tingog.
-Kun maupay in lawas imo karuyag, say adton hitaás.
