ha akon ni Thot ngadto ha atubangan han iya makaharadlok nga hukmanan. Kundi, dará han kawaray palad,
han pag-agi ko ha Babilonia nabukwat ko in usá nga
makalilisang nga sekreto, an sekreto han malimbong nga
Smerdis nga inmagaw han gahóm, an waray paghirót
nga mago Gawmata nga nagpapasugót pinaagi ha mga
tuhatuha. Tungód han kahadlok nga igsumát ko kan
Cambyses, nakaisip hin pagtima ha akon ginamit an kapadian ha Egipto. Hadto nga panahón, ini hirá amo an
mga magburuot han akon nasod; tag-iya han duha
hin tuló kabahin han mga tuna, mga mag-arangkon han
hibaró, ira iginluludlod an bungto ha kawaray sarabutan
ngan ha pagkauripon, ira ginlulurong ngan igin-aandam
basi, ha waray kuri, mahimo hirá hin pagkabarubalhin
ha magkalainlain nga magsarakop. An mga sumurulang
nadangóp ha ira ngan tungod kay maaram han ira
nabubuhat nga himurulsan inuugupan ngan tinatagan
hin higayón nga salit naginsuruguon na la nira. An
kapadian ha Egipto nagtangdo hin pagsugót han mga
sugo ni Gaumata nga labi na nga panhikaruyág kay
nahadlok ha akon nga unina bangin ko igsumát han
bungto an ira mga tuhatuha. Say nira tinapuran hini
nga talinguha an mga karuyagón hin usa nga batan'on
nga padi ha Abydos nga nagpapakasantos!...
Makasasakit nga kamingaw an sinmunód hini nga mga pulong. Adto nga ulo nagyiyinakan hin mga panlupig nga paagi ug mga tuhatuha han kapadian, ngan bisan kun nahananabi ha lain nga panahón ngan ha lain nga tuluuhan, nakakasingit han mga prayle nga nanhibitambong didto, tingali tungod kay ha sakób han dará nga kahulugán, may pagkasugadsugad han ira yaná kamutangan. Hi P. Salvi nga ikinukurog hin kahadlok, nakibig an im-im, namumutlog an mga matá nga nagkikinita han ulo sugad hin hinrarag'an. Nanlalambigay in balhas didá han iya agtang nga waray unód, kundi waray ha iya may nakakasabót kay ngatanán nalilibáng ngan pinanhihirubahan.
-Ngan napaunano man an lipat nga paagi kontra ha imo han kapadian didto ha imo tuna?-nagpakianá hi Mr. Leeds.
An ulo nginmurob hin masakit nga panhayhay daw gumikan ha sag-od han iya kasingkasing ngan an mga magkurulaw kinmita nga an iya mga matá, adto nga mga matá nga naglalaga, nagdurulom ngan napunó hi
