-Ah, matuod, kun diri ak lurong! Maaram ka nga nagtitikaluróng ako? Kundi, ihatag la gihapon basi may ada ko igpakita.
Hi Placido, basi diri manginbuwa han padi nga nag- bunyag ha iya, hinmatag han inaaro.
Inmabót hira ha Universidad.
Dida han agián nga nasulsog han mga bangketa ha magkalyo nga daplin han kalsada, nakadto napupundok an_mga magturuon nga namamaghinulat nga magkalugsad an mga propesor. An mga magturuon ha Preparatoria ha Derecho, an quinto año ha Segunda Enseñanza (High School), an ha Preparatoria ha Medicina, naghihinpurupundok hin maribhong nga katirok; inin mga urhi magsayón hikilal'an tungod han ira mga sul-ot ngan hin mga pamahungpahong nga inaabat dida han iba: an kadam'an ha ira tikang ha Ateneo Municipal ngan tampo didto hikikit'an naton hi Isagani, an tigsiday, nga nag-aasoy ha usa nga igkasi nga an pag-aradman bahin han pagsulhog han silaw. Didto hin usa nga pundok ginlalantugi, ginbabalingkot, sinasangbay an mga pulong han propesor, an nahasusurát ha usa nga basahán, an mga katikangan han pag-arám; didto hin usa liwát namamagkumpas, iginbabarabád an basahán, iginpapakita ha pagbadlis han baston dida ha tuna; ngadto ha unhan, nanhihimalanga han magpakidiyós nga nanunulód dida han sapit nga singbahán, an mga estudyantes nagmumugó hin mga pulong nga pataraw'an. May usa nga tigurang nga babayi nga nag-iingka, nasarig paglakat ha usa nga daraga; an daraga natamód paglakat, naghihirót ngan nahakakaawod pag-agi ha atubangan hin sugad kadamo nga magkirita; an tigurang nawalís han saya nga de cafe nga isurul-ot han mga Hermanas ni Sta. Rita, ngan hinkit'an in bitiis nga bahól ngan busag nga midyas, nasisinahan an iya kaupod ngan naliparo hin kaurit han mga usyuso.
-Mga saragate!-nangurutob. -Ayaw siplat ngadto, tamód!
Ngatanán nakakaaghat hin paniplat, pagtiaw ngan paghimangraw.
Danay in usa nga mahusay nga Victoria naukóy ha tungod han purtahan basi humawas in usa nga familia nga makidiyós, nalaoy han Virgen del Rosario ha iya ayón nga kaadlawan; an mga matá han mga usyuso nanlulusgaw basi magpakakita kun tiunano an kadagko ngan an
