Mandariang bunyinyo ganto
rajo bakudo di Kinari
tampak nan dari balai Akaik
nak singgah ka Koto Tuo.
Iyo ka ambo tahadoknyo sambah
dek cupak saisi jo nagari
bana batanyo kanan tuo
diwalak kalan sakutiko
nak bapituah Sutan tantang iko.
__________________________________
"CARO MAMPALEGAKAN KATO"
Ma-a Sutan.... Sungguahpun Sutan surang nan disambah, ketek nan diamba gadang, randah nan dianjaung tinggi, ma'af dimintak bana disabuik. Bana nan kadisampaikan, iyo dek lah manitah silang nan bapangka karajo nan bapokok kapado kito sialek (.................)
Tantang sambah jo titahnyo. Kok bisiek alah kadangaran, kok imbau alah kalampauan.
Lai manuruik nan biaso, gayuang basambuik kato bajawab. Tantang dari pado itu handak bapituah Datuok.
__________________________________
"MANJAWAB DENGAN BAKATO DIBAWAH-BAWAH"
Mandanga kato dari Datuok (Sutan) itu, gumanta sagalo batang tubuah, bakipeh paluah di dado, bakaja darah ka muko. ........ mangko baitu............!!
Lariak kabadan diri ambo. Nan bak biduak ketek jolong sudah pakai nan balun cukuik lai. Kok balayie manapi-napi ka tangah takuik dek riak jo galombang ka pulau takuik dek buayo lakek hak pituah urang tuo :
Baburu ka Padang Data
dapek ruso balang kaki
bawo makan ka tangah Padang.
Baguru kapalang aja
bak bungo kambang tak jadi
disilau guru lah mati
dicaliek surek lah hilang.
