| 2 | ЯКСТЕРЕ ТЕШТЕ. | № 31 |
| Эрзянь-мокшонь тонафтинцятнэнь промкс. |
| КУВАТЬС УЧИНЕК. |
Кувать учость эрзянь—мокшонь тонафтыцятнэ и весе лия эрзянь роботниктне се шканть знярдо сынь пурнавить ве таркас эсь тевест кувалма кортамо. Те шкась сась. Тедиде соксня Наркомпросонь эрзя-мокшонь бюрось терьдинзе тонафтыцятнэнь Московов. Сентябрень сисемеце чистэ эрзянь—мокшонь тевсэ роботыцятнэ пурнавсть эрьва ендо, ерьва губернясто. Састь аволь весе делегатнэ, зняро ульнесть терьдезь. Таркава губоно весе делегатнэньень ки ланкс эзь макс ярмакт. Те эзинзе кирть минек ялгатнень — ламо састь эсист ярмакост ютафтозь.
Московсо эриця эрзятнэнень а учовиль се чись, знярдо делегатнэ прумить Московов. Сынст самозост эрзя—мокшонь студентнэ анокстасть спектакль, анокстасть эрзянь ды мокшонь морот. Сентебрянь ветеце ды котоце чистэнть кармасть уш прумомо делегатнэ. Сисемеце чистэнть пурнавсть почти весе. Промксоньть ушодоманьть икеле чить делегатнэнь тэрьдизь Профинтернэнь клубс спектаколень кунцоломо. Тосо пурнавсть уш кавтошка сят Московонь эрзят.
| Промксонть ушудумазо. |
Спектакльде мейле весе мольсть с‘ездэнь кудос. Учить промксонть ушудумазо,
Чокшнэ кавксо чассто весе делегатнэ ащить таркаваст. Наркомпросонь эрзянь—мокшонь бюронь заведующий Сайгушкин ялгась панжызе с‘ездэнть.
| Кинь кочкизь президиумс. |
Сайгушкинэнь валонзо мейле кармасть кочкамо президиум. Кочказь президиумс ульсть вана не ялгатне: Дорофеев — Московонь делегат неень Центральной Комитетсэ эрзянь—мокшонь секциинь секретарь, Московкин Пензенский губкомонь мокшонь секциянь секретарь, Тужилкин — Саратовской губкомонь эрзень секциень секретарь, Филатов — Казанень делегат Татобкомсо эрзень секциянь секретарь. Не ялгатне весе коммунист. Эщо ульнесть кочказь кавто безпартийной ялгат. Скобелев Елисей — Самар. губ. делегат, Вишка Толкаень эрзянь педтехникумонь преподаватель ды Бузунов Пензань делегат—учитель. Президиумс ощо ульнесь кочказь, Наркомпросонь Совнацменэнь председатель Мухитдинов.
Промксонть омбоце чистэ Казаньстэ сась Макар Евсеевич Евсеев, эрзень ученой, од пикстэнзэ сыредимезензе роботась и неи роботы эрзянь мокшонь тевсэ. Сонзэ весе делегатнэ и промксос пурнавозь Московонь студентнэ вастызь пек парсте. Делегатнэ кочкизь сонзэ промксонь почетной председателькс.
| Мандатонь комиссия. |
Президиумдо мейле ульнесь пурназь мандатонь комиссия. Те комиссиянтень кочкизь Васильевэнь — Московонь студентнэнь делегат, роботы ВЦИК-сэ. Лямкинэнь Пензань губ. делегат, совнацменэнь уполномоченной Ив. Прокаевэнь Сар губ. делегат, Петровской уездэнь тонафтума тевень кувалт инспектор.
| Протоколонь витлимань (редакционной) комиссия. |
Редакционной комиссияс ульнесть кочказь колмо ялгат — Е. О. Окин, Деров Григошин.
Комиссиятнень кочкамодо мейле с‘ездэсь кармась роботамо.
| Эрзянь-мокшонь промксонь президиум |
| Стядо керчкедьендо ащить истят президиумонь члент: Филатов, Бузунов и Е. В. Скобелев. Озадо ащить (керчкедьендо) И. И. Московкин, М. Е. Евсеев — промксонь почетной преоседатель, 3. Ф. Дорофеев — промксонь председатель и И. В. Тужилкин президиумонь член. |
| Кодат Кевстимат Ульнесть промксонь икеле. |
Промксось примась истямо повестка.
1) Лия мастор ютксо и эсь масторсонок союзной Республиканть тевензэ.
2) Наркомпросонь Центрань ерзянь мокшонь бюронь роботанзо кувалма.
3) Кода эряви тонафтомс эйкакштнэнь васенце ступенень эрзянь мокшонь школава.
4) Кода эряви ветямс тевенть ерзянь педтехникумтнэнь эйса.
5) Школасо апак тонафт ломатнень сермас тонафтомадо.
6) Эрзянь мокшонь кельсэ кинигань печатамодо.
7) Вейке литературный кельде.
8) Лият текущей тевть.
| Месть кортась Луначарский | Ялгась эрзянь мокшонь |
| промксцо. | |
Сентябрень кевийкее чистэ эрзянь—мокшонь промксонть содавтызе нарком просвещения СССР. Луначарский ялгась Промксос пурнавозь делегатнэнень Луначарский ялгась ефтась привет Наркомпросонь, Совнаркомонь и ВЦИК‘ень пельде.
Луначарский ялгась промкссонть кортась, што ней весе мастор лангонь эрицятнэ явовсть кавтов. Ве пеле ащить трудицятне — омбоце пеле ащить капиталистнэ.
Капиталистнэ потить верь робочейтнень эйстэ. Лия масторсо трудицятнэнь эщо а саты пока виест капиталист карчо молеме. Капиталистнэ сехте пек лепштить нациятнэнь конатнэнь саизь эсь кедезост. Штобу не нациятнэнь улезэ седе чождыне кирьдемс эсь кецест — капиталистнэ дразнить эйсэст вейкест-вейкест лангс.
Капиталистнэнень тесна ульсь капиталост марто эсист даржавасо. Сынь ней вешнить лия государстват, ков можналь эцемс, косо можналь трудицятнэнь эйстэ потямс седе пек верест. Вана ней не читнестэ капиталистической державатнэ Америка, Англия, Франция, Япония варака лацо пурнавсть Китаень кругом. Китайень трудицятнэнь сынь тылкадызь туреме вейкест вейкест лангс — тейсть гражданской война.
Америка умок уж пезнавтовлензе кенжензэ Китаень грудьс ды меши тензэ вишкине, виев Япония, кона тожо арци-думи эцеме капиталонзо кис. Минь ней сынекь капиталистнэнь ютксо арась лад. Эрьва капиталистэсь саевель эсьтензэ седе ламо. Вана те жадностесть кувалт трудицятнэ седе курок ерцызь капиталонть. Коминтерн терьди весе угнетенной нациятнэнь эсинзэ знамянзо алов. Терди эйсэст минек марто вейце туреме капиталонть марто.
Минек Союзной Советской Республикасо, кода властесь саевсь робочейтнень ды сокицятнэнь кец весе вишка нациятнэнень максть свобода. Робоче ды крестьянской властень пингстэ, кода тонавсь В. И. Ленин, минь весе вишка нациятнень, макстанок свободной эрямо чи. Минек республикасонок самой вишка нациентень кодамо сон чопуда илязо ульть, минь макстанок эсь кэльсэст школат, эсь кельесэст кинигат. Минь весе вейсэ стараятанок, бажатанок не чопуда нациятнэнь тееме культурныйкс. Сестэ анцяк сынь вадрясто кармить эрямо и парсте, чарькодить месть мери партиясь и молить коммуни партиянть мельга.
Мейле Луначарский ялгась ефтызе мелезе, штобу минек промксоньть тевензэ молевелть седе вадрясто, мерсь седе чумбрасто теезе эсинзэ тевинзэ.
| Наркомпросонь Центрань эрзянь-мокшонь бюронь работанзо кувалма. |
Васеньцекс тейсь доклад Сайгушкин ялгась. Сайгушкин ялгась кортась кода молить минек тонафтума тевенек. Тевесь моли пек берянстэ. Зняро минек учительнек, зняро школава тонафтнить эрзянь—мокшонь эйкакшт, зняро тонафтнить эрзянь од ломать покш учебной заведениява и бюро те шкамс парсте а содасынзе. Не сведениятнэнь бюро, губернятнэнь эйстэ кода эзь вейшть, те шкамс вадрят сведеният эсть кучт.
Минек аламо эрзянь—мокшонь учительнек. Секс школава тевесь те шкамс лац эзь нолдавт. Школава эрзянь-мокшонь учительтнеде весемезе 103 ломань. Педтехникумонок косо анокстатанок эсинек учительть аламо. Педтехникумтнэнь эйсэ эсинек преподавателть а сатыть. Сайгушкин ялгась корты: кодамо стака ней эщо панжомс миненек педтехникумт. Эрявить эрьва таркас ярмакт, ярмаконок арасть. Секс эщо беренстэ мольсь минек тонафтума тевесь — араселть эрзянь кельсэ а кинигат, а учебникт. Анцяк те иестэнть бюро анокстась колмо учебникт мокшонь школас ды кавто эрзянь школас. Икеле иетнестэ учебникт араеелть*. Ульнесь анцяк „Тундонь чи“ эрзянь букварь, кона умок, уж—весе миезь, ды кона ней таштомсь уж.
Сайгушкин ялгась кортась, што бюронь роботась мольсь аволь истя, кода эряволь но сетыки кой мезе теезь. Те иестэнть анокстазь вете учебникт, терьдезь ульнесть таркава промкет, пурназь вана те промксось, ульнесть содавтозь таркава эрьзянь педтехникумтнэ..
Икелев миненек эряви седе парсте путомс тевенть. Эряви весе вийсэ паролгафтомс педтехникумтнень материальной положенияст. Эряви седе парсте путомс учебникень сермадума ды печатамо тевенть. Эряви сы иестэнть кодаяк саемс седе ламо таркат покш учебной заведениятнэнь эйса.
Сайгушкин докладонзо прядызе кемень чассто. Прениятнэнь кадызь валацкесе.
| Валскень заседания. |
| (Сентябрянь кавксоце чи). |
Валске промксось кармась роботамо 10 чассто. Васня Сайгушкин максь ответ кевкстиматнэнь ланкс. Сон ефтась, што. В толкаень педтехникумоньть арьцесть саймензе Самаров — кадовсь таго В—Талкайсэ ярмаконь а сатумань кис.
Покш учебной заведениятнэнь эйс Вуз‘сь командировкат од ломатненень те иестэнть максыль аволь НКПрос — максылть командировкат партиянь секкият. Ламо ульнесть ощо кевкстимат, конатнэнь ланкс Сайгушкин максь ответ.
| Преният Сайгушкинэнь докладонзо кувалт. |
Ламо ульнесть кортамот центрань эрзань—мокшонь бюронь роботадонзо. Аволь ламо муевсть ялгат конатнэ бюронь роботанть эзизь сялдт. Весе делегатнэ конат кортасть Ссйгушкин докладонзо кувалт весе сынь чумондеть бюронть берянь роботанзо кис.
Чурин — Татреспубликань делегат кортась Сайгушкинэнь докладонзо кулцонозь, мон арцян, думсян, што бюро а соды эрзянь—мокшонь эрямо чиденть. Бюронь роботась пек берянь. Таркатнень марто паро связь арсель. Кода эряви губернянь роботниктнэнь роботамс бюро знярдо як а невтиль. Минь роботынекь минць, кода содынек, кода маштынек Центрань нефтимат а учовилть.
Григошин — Наркомпросонь эрзянь—мокшонь бюро берянстэ теиль учебниктнэнь сермадомсто. Сынест сермадомо эряволь максомс аволь вейке ломаннень. Эряволь те тевстень терьдемс губернява роботыця эрзятнэнь. Истят ломать, конат кундаволть бу те тевентень муевелть. Бюро таркава школатнэнень а максыль указаният, кода ушодомс эсинек кельсэ тонафтуманть
Лямкин: Мон нейса бюро аволь анцяк берянстэ роботась эрзянь бюронть мельза як арасель роботамо. Саемс хоть сведениятнэнь. Сайгушкин ялгась ефтась минек улить весемезэ эрзянь—мокшонь учителть 103 ломань. Косто сон саизе те цифранть. Минек вейке Пензань губернясо эрзянь учительтнеде седе ламо.
Прокаев. Ней минекь школасо сави эйкакшткэнь эйсэ тонафтомо эрзянь эсинек кельсэ Наркомпросонь бюро кодат как указаният те тевенть ланга эзь максокшно.
Ульнесь кучозь школава эрзянь букварь „Тундонь чи“, но арасель кодамояк указания, кода сонзэ кувалт тонафтомо.
Желтов Ц. Комитетэнь эрзянь мокшонь секциянь секретарь. Тесэ весе ялгатне пек салдыть Наркомпросонь бюронть роботазо. Сялдумадо, икеле эряволь ялгатнэнень ваномс кодамо
