| № 28 | ЯКСТЕРЕ ТЕШТЕ. | 3 |
Мон вана эрян руз велесэ. Тесэ уш кудотнева нолдасть электричества. Велесь аволь пек покш, а газет сермадыть ламо. Сякой газет: „Крестьянская газета“, „Беднота“, “Правда“ ды эсист уездэнь газет. Клубсост уле стенной газет „Тарваз“.
Истя эрить руст сюровидицят. Эжли саймекс заводсо роботыцятнень — тосо седе паро. Эрзятнень-мокшотнень мезест как арась.
Пурнамс эряви тонавтомо минек чопуда дикой ломатнень.
Долгов.
| Сокамо-видимань тевть. |
| Ванстодо озименк. |
Сась сексь. Тюжалгацть и пеерцть масторов вирь лопатне. Се шканть коромось паксястонть машты, скотинатнень андомс а мейсэ. Кармамс скотинанть ощо васень сексня андомо кардайсэ, коромось теленень а саты. А теленень коромонь анокстамо сюровидицятне ощо эсть тонат.
И вот сестэ сынст кармить машнеме превест: ков теемс скотинанть, мезде сонзо андомс. Куть печкик сывелькс. Виде-паро се шкантень лисить озимтне. А кенерить сынь саеме коретт, а кенерить тустолгадомо, кода уш сюровидицятне кармить ваномо скотинат озимтнень ланга. Нолдасызь и алашаст и скалост и ревест стаданек. И те мазысь карме улеме ловонь прамс.
Знама, истя сюровидицясь ванцсэ коромонзо, но сон аздасэ тень, что скотинань ванозь сон коласыньзе озимтнень, конат уш тунда покш урожай а максыть.
Вана месть сермадэ тень кувалт агроном Стуковнин:
„Монь ловомам коряс озимтнень ланга скотинань ваномась нельксэ сюровидицянть кецтэ урожаенть нилице таликанзо. Истяжо кортыть и сеть сюровидицятне, конат ней лоткасть ваномо скотинаст озимь ланга“.
Несынк, „нилеце таликанзо нельксэ“. Сядо пондонь таркас, саят анцяк 75 понт, а 25 понтнэнь сэвсызь скотинатне.
Алкукс, если нолдасыть вачо скотинатнень озимтнень лангс, то сынь празь прыть озимтненень. Те ощо аламо, что сынь озименть нарасызь, как васонь пеельсэ, но теде башка пелешканзо тарксисызь коренэк.
Пек покш зыян теи скотинань ваномась начко шкане севонев мода ланга, кона пиземеде мейле теиве чапаксокс; озимтне пек тапавить и тарксивить.
Можна скотинатнень ваномс озимтнень ланга сестэ, кода озимтне кармить касомо пек виевстэ и коли можна ули пелемс, что сынь ловонь прамс туить трункас. Сестэ урожаеськак а вишиньгады. Анцяк эряви кочкамс коське чить эли кода кельми модась, чтобы скотинатне авулизь тапа и кореном авулизь тарксе озимтнень. Пек паро уливель, если сестэ озимтнень лангс нолдамс анцяк крупна скотинанть и дух аэрявить нолдамс тозой реветь, конат озимтнень как васонь пеельце нарыть. Ульнисть и истят тевть, кода реветнеде мейле озимтне уж овсе юмсисть.
1. Модась теиве тиньгекс и сон мейле истя коське, что сонензэ а понги а ведь начко, а свежа варма кошт; а сынстемест кодамояк сюро а касы.
2. Копыта следтнэнень пиземев сексня и рана тунда понги ведь и те начкось карми наксавтомо озимтнень.
3. Пельц тарксефт озимтне пек а кирьдить кельмень чавоманть.
Чей эрьвейке содасы, если озимтне юмить, то тунда тарказост туе тусто тикше. Се тикшесь вельтясынзе остатка озимтнень и кодамояк урожай а саят.
Но минек тень кувалт дух а думить. Эряви содамс, что скотинань ваномась вишиньгавты урожаенть и розори хозяйстванть.
В. Ш.
| Трехпольесь аэряви. |
| (М-Толкай, Бугурусланский уезд Сам. губернии). |
Вишка Толкаинь эрзятне собраниясост постановили колмо паксетнинь эйстэ теимс ниле паксят. Те постановлениесь эзь кадувт анцяк конев лангсо, а ветезь уж тевс.
Эрзетне кортыть истя: „кабу минек уливелть ниле паксянук и вейкись эйстыст уливель видизь картухадо, просадо, чинчарамодо, то вачо пеке минь авулинек кант. Оно Педтехникумонть пельпаксяст картухасо видезь и сынст тедиде горясткак арась, сынь саить 1500 пондо десетинасто, а минь коть сейчас пейть лався лангс вачкить. А стяк тосо ученой ломать роботыть, содыть мезе видемс. Секс нать кунцоломка ученой ломатнень“.
Нилине ие толкаинь атетне ваныть техникумонь паксянть лангс и те ваномась стяк эзь юма, а кода несэнек, максь покш лезэ.
Маний.
| Ведьгак ашти, калгак ули. |
Ютась иестэ сексня Ташто-Захар велинь сокиця, Трифань Данча, тейсь вана месть.
Умарь садонзо кунчкасо ульнись ташто лисьма. Сон саизе ды урядызе, нолдась эйзынзэ сруб, а седе бокав чувсь яма 20 квадратной сэль келизэ, 9 вакст сэризэ. Лисьмастонть ведрасу тарксись ведь ямантень и нолдась тозонь кото хунт колт—карась. Те иестэ ямась уж пешксе калдо. Данча мере, что калусь ули ней 5 понт, как сукст лакить. Сексня эряви нярыяк кундамс, ата а кельгсть ямантень.
Ней Захар велин атетне мереть: „Вот так Данча! Коське таркас тейсь калунь сад. Ведьгак ашти, калгак ули“.
П. Кочетов.
| ОМЕЛЬКАНЬ ВАЛЬМАЛО. |
Тундо. Чизэ, как баяга. Народ паксясо, сокить-видить сюро. Омелькаяк тусь умань невтеме чачк сокицянень. Юты Морозовонь Мишень пева.
— Чумбрат Михаил Лексеич! — саизе чапканзо.
— Эрсян яла — мере Миша. — Васув молят?
— Вана умань невтеме.
— Адя оймак аламус — лоткавтызе Миша.
Омелька валгсь, мольць Мишень малав. Сайсь коморозонзо мода, сювордызе — модась поколькс велявсь, начколь.
— Э-э, Лексеич! Тонь лия пазот улими карми, а вакскат сокиценть лия.
— Мекс истя? — мере Миша.
— Мекс? Ванат, мезе тонь модась — начко поколь, а тонь шабранть совсем коське, сокозояк машць. Пизими аулиндерей миник уматнень лангсо сюротне а лисить.
— Мон ведь, Емельян Фролыч, сексня жниванть сокия, а тунда, кода ловось солась, изыя. Сон содат сексня покольтне кодашкат ульнисть. Тунда изыя, модась чевтемсь, а чевтесь истя а коськи. А ловонь ведись ковгак эзь чуди, веси теске кадовсь.
— Месть кортамс, Лексеич. Тонь нилишка чи ютазь сюрот лиси, а конань сексня кадувсь апак сокак — учик, знярдо лисить.
Омелька тусь вакстунзо. Эсь пачканзо думи:
— Вана элесь теи, эрияк парсте, а минь мезе? Небось, сонензэ пазусь максы, коли сон апак нузялт роботы.
Мишань мельц пек тусть Омелькань валунзо. Сон сельгизе цигарканзо и веселасто тусь плугунзо мельга.
* * *
Ютась май месецесь, ютась и юненть пелезэ, а пизиме ощо арасиль. Модась пси пачалгонь кондямо, весе лазнувсь. Лиясто истямо чи лиси — шкань, шкань натой писи варма пуви. Тикшитне кармасть коськиме, сюрутнеяк истяжо. Народонь кедест-пильгист новолсть. Кува якить анцяк вайхснить.
— Вай таго пазусь прогневался лангузонок, вай пек уж грешнойтянок.
Чистэ секе тев — баягатне кальдирдить, поп пизиме веши. Чокшне мезе марят — моравтыцят, а сон сыре тейтиртне ды доватне сыргасть калмо лангс покштень-бабань кецтэ пизимень вешивтиме. Тосто лисьма лангс и вень берть озныть. А пизими яла арась.
Росьне пока аштить стайсост, пря каесть. Поздойтне овсе эсть листь.
— Урьва! Тихонской божей матеренть, коля, туизь — мере Полага баба урьванстэнь.
— Туизь, авай. Кудува кармить якавтомо молебен марто.
— Сестэ миненикак тердимс эряви.
— Тердимс эряви, ды попонтень ведь пельпондо розь максумс молебенэнть кис, а миник тосо стойканть потмакскисэ кадовсь, одс а сатстувтам.
— Я, урьва, кода жо ней? — лужанясто таргизе вальгеензэ Полага баба.
— Кода? кода хочеш, а сюрось недляс анцяк саты, а мейле вачодо аштик.
— Осподи, осподи! Нать уж кадык терцизь, конань сюрост ламо — сонць кармась авардиме.
Валцке таго баягат чавить.
— Эй, Анка! Молят Сема—ключив? Народось веси тусть уж исяк тоск удумо. Божей матерентькак сайсызь тов. Весе велинь пазаватнень ливсызь. Миник пазаватне, Назь велень, Захар велень, Норка велень, веси, веси и Эрьмиевонь и Пумбрань. Адя, мон уж сыргинь.
И моли народось Сема ключив, пикс лацо таргавсь китнень ланга. Пакшень пес молць народось озномо Сема ключив. Тевисткак кадызь — вешить пизиме. Пазусь глухойгаць и сокоргаць — а мари а неи. Пизиме яла арась. Роботаськак пизимтеме седийс а педи. Эрьва чокшне прумить ператне Омелькань икилив и давай спорямо. Мезе лангсо анцяк а спорить!
— Секс пазусь пизимеяк а максы — коммунистнэ азаргацть. Кортасть, буто Пензасо пизименть менильстэ таргавсть ды эзь таргавт тенст. Ковонть хотят ледьмендэ. Кода анцяк пазось истямо покоронть кирьди. Од ломатнень вейкиньгак кирьгасост крест арась. Ды мезинь кис истятнэнень корьмакайсь максы пизиме? Истят безбожникненень? Ванодо — сюротне коськсть, а менильсэ, корьминецькем, вейкияк пель арась.
— Ужо, Гаврила покштей — лоткавтызе Гаврила атень од цера, член политпросвета. — Ведь тынцинк писаниясо евтазь, что пазусь „всемилостивой“. Тон монь коряс седе парсте содат, кода пазусь кортнись пророк Иона марто. Сон мерць, будимкс городонть эйсэ коть вейке праведной улизэ — а токасы се городонть. Оно кодашка милостизэ. Евтак ино монень, мези чумост ульнись эйкакшнэнь, конат карув лацо кулцисть вачо шканть эйстэ? Ведь писаниень валтнэнь коряс вачо иестэ минь кодамояк нужда авулинек нек. Пазусь аволь анцяк праведной эйкакшнэнь, но миникак эйкакшнэнь кис жалявлимизь, кода сон вейки праведникень кис цела город грешникть жалесь. Миненик буто уж по делом, эйкакшнэ, евтак, мезинь кис кулцисть? Сынст мезинь кис наказынди? Нейгак вана ков сон милостиндэ кекшезе — пизиме а максы теник? Мон бу пазунть таркасо максувлинь пизиме анцяк секс, чтобу аволь уль виськс тень писаниенть кис.
— У, безбожник! — пижни Гаврила атя — евтак ино, мекс арась пизимесь?
— Мекс? Наукась эряви кевкстимс, сон уж евтасы. Наукась мере, что истямо коськи варма пуви кувать и меше пизиментень пурнавмо.
— Наука, яла наука — музгурди Гаврила — Мекс науканк марто пизимись эзь таргавт? Марить Пензасо месть тейнисть?
— Наукась мере модасто пизимень таргамо.
— Се кода истя? — сразу пшкацть колмо-ниле ломать
— Кода? Сокик сексня жниванть ды тунда рана изык, а мейле сеялкасо видик — вот теть наукань пизиме!
— Нет уж пазусь...
— Минь яла пазунть — пшкаць Омелька. — Пазусь весинень вейке, а мольтя паксяв — уматне разнойть. Миник уматне пазунть марто эли Тюженть ды Морозовонь Мишень. Мекс сынст сюрост а ули, коли сынь роботасть перьканзо миник коряс кавксть седе ламо. Миша соки ды ваксунзо Рогожкин соки, покольтне уманзо лангсо вана кодашкат. Видизь ве чистэ. Мишень сюро, а Рогожкинынь мезияк арась. Сон пожалуй чекак и чекак, а....
Месть бути ощо хотел кортамо Омелька, ды атякшны кармасть сеириме.
— Знярц аштинек! Адядо, атят, веси нать а кортнивить.
И тукшнусть веси кудува.
А валцке таго кругом баягат чавить...
А. Ер.
| Тонавтнимань тевть. |
| Просветительный тявенекь. |
| (Мацьказ вяле, Петровск. у., Сарат. губ.). |
Минекь Мацьказ вялеса и весе волостьцынть тедиде пекь покш шага теинек просветительный тявсэнть. Весемезэ минекь волостьцынть сисемь вялеть и вяси эрзянь. Кото вялева улеть ловнома кут, сисемецэсэнтяк курык панжить. Кажный (эрьва) вялеса уле политико-просветительный кружок. Мацьказ вялесынть уле ловнома кудо, клуб, волостной библиотека. Ули волполитпросветком, конань кеца аште вяси просветительный роботась волостьцынть. Кажный нядляне эрить спектакльть и доклат пазонь кувалт, вялень хозяйствань кувалт и лият. Мацькайса 550 хозяйства и вялинти сыть ниле сят газет. Вяси волостесь газет получе 1.300 штук, а хозяйстватнеде вяси 2.500; так што кафта куц сы вейке газет.
Вяси ловнома кутне получеть несколько газет, народось яке тов ловнома и тяфне молеть лац.
Думатана кажный ловнома куц выписать главполитпросветцта библиотекат, вяйке уш выписали.
Теленти тявенекь тусть пекь парцте.
Т. Учайкин.
| Од кинь вешниме. |
| (Алова веле, Пензенской губ.). |
Ули минек велисэ Кипуров Федень церынезэ Ваня, вейксэ иесэ. Тонафтниме якась ве ие.
Преображениень чистэ тусь ярманкав Сабанова велив, а думонзо ульнинь авуль ярманкань. Тосто тусь сон Пермиевов. Совась волисполкомов. Сермадымизь, мере, вана монь комсомолокс.
Фроловнин ялгась кучизе сонзо кудув, а тетянстэнь сермаць, чтобу сон
