Page:Татю (Т. А. Раптанов, 1933).djvu/71

From Wikisource
Jump to navigation Jump to search
This page has been proofread.


Иван атянь сельме латктнэнень, прок лисьма прясто ведь плескат появасть. Кирга паризэнзэ куйсь ал. Кодаяк анилеви сельгезэ. А евтави тензэ мик вал. Сатовольгак Иван атянь виезэ масторонть омбоце боканзо лангс бу велявтувлизе. Беляковонь прахонзояк саевлиссе.

Лецть Иван атя мельс ютань потань тевтне. Прок сэредьксэнтькак стувтызе. Озась.

— Месть марсевить велесэнть?

— Тевтне берять. Келя казакне сыть велентень.

— Еминек ней... Пачк керясамизь... — Покш вайгельсэ лайшеме кармась низэ.

— Илядо авардть... Илямизь машневть. Пичкан... Мон велявтсынь тест не чавоматнень.

— Кирвастемс куторось. Кадык туи менель ежов. Эх... Иван... Минек велень, ламо сюпав атят лездыть Беляковнэнь. Евтнить минек эйсэ. Минь ведь салава сынек тонять. Казакне сыньдеряйть куть загодь кадык веленть. Эх, эрямо!.. Мейсь истя наказымизь вере пазось?... — Вася каизе вановтонзо пазаванть енов.

Иванонь низэ риктетець эзем песэнть. Пакшатне прок нимилявт педясть цеця пряс — аванть элес. Сынь эсть сода мейсь горевить покш ломатне. Сынь эсть чарькодть... кодамо нужась. Яла теке потмурасто ванность покшнэ лангс. Пек чийсь покш церанть седейс тетянть сэредьксэсь. Сон нолдызе прянзо аванть элес, стакасто кепсевсь местезэ.

— Пичксик, Иван брат...

— Стяк седе курок пильге ланкс...

— Кекшнеть мезеть улить. Казакне сыть тече.

Теке марто лиссть колмонест Иванонь кудосто Иван ульнесь озадо. Мейле стамбарнэ нолдызе таркантень рунгонзо ды пшкадсь:

— Чемень керизе седеем. Нупонь валовсь потмозон. Яла теке вельман!.. Куломо мелем арась... Виеман, седеем маре тень эйстэ.

Лапа Вася ансяк пачкодсь кустима пес, велентень арьцть казакт, мерят прок нимилявт ливтить велеванть.

Киштить алашатне казакне ало. Атаманось трой-

69