Page:Татю (Т. А. Раптанов, 1933).djvu/70

From Wikisource
Jump to navigation Jump to search
This page has been proofread.


но амаксса ревенть. Кадык токасамизь яла — теке вейкинть эйстэст поваса. Кирга пакшонзо сейса, ревенть амаксса“. Сонсь панць алашанть. Казакне ардсть каршозонзо. Алашась нумолкс ертовсь ве бокав. Иван атя ревенек быжневтэвсь Ратор береконть алов. Месть мартонзо тейнесть а евтневить. Ансяк чавомадо мейле тонгизь лов ведентень — наслогонтень.

Лапа Вася такода эзь понк тест, салава вансь Иван мельга. Кода тусть Иван ваксто казакне. Вася таргизе ведьстэнть. Чуросто чавсь Иванонь седеезэ. Ансяк цють лембстэ кадовсь.

Вася варштась ведентень. Ведесь човрявсь верь марто.

— У! Кадовт живстэ, Иван брат! Кадовт. Те верьдинть сынь симить! Пешкедеть те верьденть. Иля куло!.. Виемть! Минь нардасынек сынст... Тень акадсынек истяк... Адя стамбарнэ кудов...

— Мон вельман... Мон акулан!.. Мон те верьсэнть кирвайса масторонть! Адя Вася кудов... Лездак... — Вася саизе кавалалдо, стамбарнэ ловонть потмова тусть велентень.

* * *

Велесь кувсесь, лов зубороктне матрасть лато прятнень. Кашто моле велесь. Ансяк кежейстэ пуви экше вармас. Ломатне норастост эсть лисьне. Анцяк бути лиси кардазов пурнасыньзе скотинанзо ды мекев каштом лангс.

Иван атя ашти тарка лангсо. Кодаяк авелявтневи рунгозо. Сэнь максокс теевсь атянть телазо. Стамбарнэ кувтси.

Аламос аштезь совасть Вася, Спиря ды кой кие. Иван мазыйстэ варштась лангозост. Мерят прок мелезэнзэ паро, што Вася ды Спиря эсть понг чавомс. Сон куть пек сэредсь яла-тек пельс пейдезь ванць лангозост. Вася ознось пазавантень. Мольць Иваннэнь.

— Пичксят?! Кодамо ежот?

— Вадря... — Иван атя каизе прянзо омбце пелей. Прок кежеявтсь.

68