юккэд тан вин-мурь-шэнтмест тэн пейв райя, кось алгам тійи-вуйм юккэд од вин му едж царвудэ сист.
30. И кось лавлэтиш, вулькиш Елеон термь эл.
31. Танна сарн сійит Исус: пук тій ряхкдувветте му баяс тан ин; тэн-дет што ликирьетам: таклам варредій, и ратькедэдет тук лампаз.
32. А мон иджан пайенам баяс сагэтам тійит Галилеест.
33. Педар цилькій сунне воста: ленджет пук ряхквудет ту баяс, мун им ряхкэдед ни кось.
34. Исус цилькій сунне: вуйкист сарнам тунне, тан ин, эвд-бельт кон орес-кань лэηкяй, колмэешт сарндэдак мусьт.
35. Сарн сунне Педар: леччи мунне галгэч и яммед туйн: им сарндэд тусьт. Эвт налла сарнуш и пук вопнаттій.
36. Маηηа дест поттал сійи-вуйм Исус сайя, сарнтаманч Гефсиманія, и сарн вопнаттіит: аррэстекке тасьт, кон мон волгам, айестастам томбе.
37. И вальдій мельдес Педар и кухтэд Зеведей эльгит, лосьвудешкудій и тужэшкудій
38. Танна сарн сійит Исус: му иηк лосьвудуш сорьм налла; ворьтлеккед тасьт; и валвэдекке муйн.
39. И ваньцласьтій кряха чорлакше, вэнлэдій иджес мод эл, айестій и сарнэй: ечча му! леччи ойям налла; ань ман рай му тат напь: а ій нуть махт мон татам, но махт тон.
40. И потьтал вопнаддэи гарра, и кавнач сійит уодьмен, и сарн Педре: нуть еппед вайеманч валвдед эвт цас муйн?
41. Валвэдекке и айестекке, тэн-дет што еппе вирэчи кутталмуже. Вуйη валв а лешк поад.
42. Вял уйтластій нумб вар, аестій и сарнэй: Ечча му! леччи ій вай тат напь мэннэд рай му, му югкянна, ань ленч ту валт.
