танна рягашкодет пук манд-род, и уйнэстет олмэ эльгь потмен эльм пэлвэ эльн еннэнь вигэнь и эл-нэмэнь.
31. И вулгат иджес ангелит иηсэнч труббин, и чоηгет су валлэшэммэть неллен пиηгэнь эльм чоарэст и сій чоарэ райя.
32. Смоков-мурест вальтед мокамвуд: кось су овзь шэндешкотте суппэд и луштэлет лэстэт; танна тетте, што кесь ли эльт.
33. Нуть кось уйнветте тан пук, тетте, што эльт ли, увзэ пут.
34. Вуйкест сарнам: тійит: ій пуд тат пулв-шант, кон тат пук ленч.
35. Эльм и мант пудет: а му саг е пуд.
36. А тэн пейвест и чассэст ни ки ій тіед, ни эльм ангель, эхт му еч.
37. А махт ляй Ной пейвэть, нуть ленч и олмэ эльг поттем-налест.
38. Нуть, махт эвд-бельт кэцкем-баль порриш, юккиш, найтлэттиш и вэйттиш куйе, тэн пейв райя, кось Ной мэній ковчеги;
39. И ет юртманч, кон ій поатманч кэцкмуш, и лоптаманч пукэдь: нуть и ленч олмэ эльг поттем-наль.
40. Танна ленджет кохтест пелда эльн; эвт валтлат, а нумп куддастал.
41. Кохт мелдаттій жорновэ лунь; эвт валтлат, а нумп куддастал.
42. И нуть валвэтекке, тэн-дет што еппе тед, кон цас тій Господ пот.
43. Но тан тій тетте, што ленчи коть-хозьин тедэчи, кон вартьем-баль сул пот; танна сон валвэчій и ій андэчій койвэдь иджес кодь.
44. Тэн-дет и тійид галк ляйед валмэшит; тэн-дет што кон цас еппед іорьд, пот олмэ эльк.
