Numez
Numez
L'era l'inom de un di più gregn nemisc di fascegn. Canche l'à vivù e che sort de jent che l'à comanà no se sà più. Ma l'inom fasc amò spavent. Olache l ruaa, vegnìa dut destrut. Ciampes e pré vegnìa pesticé sù daldut, bosć e majon brujé e veies e pìcioi mazé, e omegn e touse e fémene bele venui a schiavitù. Chist mostro, om no se pel dir, con n grumon de sie sudé, che era ence bestie desche el, l'é ruà ence te Fascia. Seben che i fascegn era verieres gaèrc e zaches (= tenaci) i à cognù zessar. Le fémene che era ló, a veder che i omegn i sciampa, le é vegnude a didar ai sie, con ogni sort de massarìe. N ùltima le ge trajea perfin ai sudé nemisc i pìcioi tal mus. Ma nia no à joà! I à cognú zessar. I é sciampé coi sie e i se à sconet te chi cougoi e te chele tane su per chi crepes. Ma inant de se n jir, i ge à dat fech a le majon e ai tobié. Cauja che l nemich à troa nveze de paìjes nia auter che roìne e che no l'aea nia da magnar e che l'era d'uton tart, l'à cognù zessar, per no morir da la fam.