No ge vel ge dar fe dut a le fémene

From Wikisource
Jump to navigation Jump to search
No ge vel ge dar fe dut a le fémene  (1912)  by Hugo de Rossi
ladin Brach
grafia moderna

No ge vel ge dar fe dut a le fémene


Na uta l'era n patron e te stala l'aea doi manc e n musciat. L'era la vea de la gran cena (da pasca Tofana) che le bestie parla. L patron l'é jit a scutar ju tedant l'usc de stala.

Un de chisc manc l'à dit: Gio se i me fasc semper lurar coscì, no son bon de tegnir dur. L musciat l'à dit: Te es ben mat, fate malà canche tu cogne jir a lurar e dapò tu vedaras che i te lascia pussar. Canche i volea jir a tacar sora i manc, un no l'era bon de levar sù.

E l'à dit al patron: Anché cogne l lasciar pussar e l rencurar e meter sora l musciat.


Canche l'é stat da sera che i é ndò vegnui l disc l musciat al manz: O co ela anché?

L manz l disc: O anché la é ben jita ben: i me à dat da magnar più bon che i etres dis e é podù pussar dut l dì. Mo l musciat l'à dit: I à po ence dit che se doman no tu es bon de lurar i te maza. L manz l disc: O inant che me lasciar mazar laore.

L patron l'à sentù dut e l saea che se l disc che che l'à sentù da le bestie l cogn morir. L'é vegnù sun majon e l'à scomenzà a se grignar. E so fémena che la era curiousa l'à domanà percheche l se grigna. E l'à dit che l se grigna bele per nia, che no l volea ge dir. La ge era semper dò, che la volea saer percheche l se grigna. Nfin che la l'à stufà. Dapò l'à dit: Mben faré na cena e nviaré duc i mi amisc e dapò te l diré.

N chela sera che l'era la cena l'era l cian de fora da usc dut cruzià. E vegn l gial su per sćiala bel aiegher. E l cian l disc: Tegnete de mal ve tu a esser coscì aiegher che prest nosc patron cognarà morir. Enlouta l disc l gial: Bon bon la ge stasc, se l ge vel dar fe dut a le fémene. Che gio volesse far coscita, con caranta che n'é sot a de me. Ma gio can he bate le ale dute le trema. Coscita l fae ence el.

L patron l'à sentù e canche l'é stat che i à fenì de cenar e ela l'à dit: Ades dime percheche tu te as grignà.

Enlouta l'é jit e l'à tout n bachet e l'à scomenzà a ge dar: L disc, ades tu sas percheche me é grignà.