N puo de fusere de Lescio Batestin
N puo de fusere de Lescio Batestin
"N dì rua Vinzenz de Tone con ac e sciusciuri ja Batestin:
- Che Dio Dio, chël vost mulo l é de seguito su nosta fava che l laora. Cojì nò, cojì no ne resta gnánca i balac. Cánche ben s' à fat e laoré l é i autri che va a se la mangé.
- Po dingo dingo, no sarà pa miga sté chël nost che l é dagnëra a cesa.
- Cánche l è vedù, l é sté chël sci.
- Po nò nò Vinzenz, l Lescio no fesc pa de tel fusere vedé!
- Po, e sci, l é sté chël vedé. Se l esse vedù mi sol che son orbo pazienza, ma cánche duc chi de Paluacia l à vedù bastarà. L é duc che brontoleia da chëla su che no s' é plu segur de chël clonton.
- Po nò nò Vinzenz, l Lescio no n' é pa sté, scouté pa bel chiet e jìvene.
- Ades fajé pa ci che volei, dit ve l è e se no joa son sforzé de jì davò i gendarmi, - e fora da porta fora.
Soura n toch rua Lescio adalerch mangian fava.
- Mere ci ciapio ncuoi da marëna?
- Po Lescio, esto ti eh? Proprio del viers vè!
- Ciaponso cajunciei ncuoi eh?
- Dingo dingo, no te ndovinásse chi che l é sté chilò de sto momento.
- Sarà sté l doje.
- L é vignù Vinzenz de Tone a se lamenté che l é dagnëra valgugn sun sua fava. Saralo vera? Mi no l' è pa cherduda vè.
- Oh, l' è pa ben vera, son ence mi sté su. Son vignù ju proprio de sto momento!
- Oh, po chëst no n' é pa vera cuti nò Lescio?
- Po chël sci che l' é pa vera zenza dì boujie.
- Oh, po Lescio, demè dì pa la verité. Cuti no che no t' es sté su?
- Eh, sarà pa ben vera, vedé chilò i cosoi. Le fave me i è bele mangiade senò volësse ve mostré ence chële.
- Mostro de tosat che t' es, te legne pa se no te dighe la verité. Ades dì bel da brao la verité: se t' es sté su sci o nò, e po te la perdone.
- Spo mossarè ncora jì a tò i balac che è trat fora se no me cherdei.
- Percié disto boujie? Speta mi! Ulà elo l plumac. Mi voi pa te goerné vè, boujiaron che t' es. - E tol ca n plumac e scomencia a ie l sclefé via per la schëna. - Mostro de n tosat che t' es.
- Ci mel che me fajei mere. Bon ades! Au au… Bon mere, no dighe plu de tel boujie ... Au au au…
- Mi voi pa te mëte a dì la verité n auter viade!
- Au au… ci mel.
- Ades scouta Lescio, scouta...
- Au au au ...
Scouta Lescio, scouta. Ulà t' eio fat mel? Scouta che te feje tortiei da marëna. Scouta...
- Oh Dio, ci mel che m' ei fat.
- Po dingo dingo no volësse miga te fè mel, ma cánche mei t' è ligné. Dio verde che tánt bel podëve te orbé. Te feje pa tortiei da marëna, te feje pa... Nte n' ora i mossa pa ester fac. Sta chilò ntánt che i feje... Ulà che te vos jì… Sta chilò che feje prëst… Sta chilò ...
- Nò, mi vade, vegne pa ben.
- Ulà vasto?
- A me tò doi o trei cosoi.