Mia möta ne n'ê fedela a me
- Mia möta ne n'ê fedela a me.
Mia möta ne n'ê fedela a me,
Ligrëzes n'âi degönes plü,
Salté saltâi pro n bel gran rü,
Passan l'odôi dlungia le pre.
Iló bel chît y desperé
Senté m'un stôi ciurn y mat,
Co ion me fossi t'ega trat!
Cun döt chësc monn me parôl de rodé.
Zacá dijon aldîi sëgn -
Iö fô olté y mostrâ le spiné -
Usc tara n'essi mai doviné:
"Ne jí pa sot, al foss ri sëgn!"
Mi sanch parôl ch'oress bolí;
Na möta, cöcena tan co n pom,
"Tarina", dijera, "té, é mi inom."
"Tarina, t'es insciöche l'orí;
Da burta mort sëgn m'as' salvé,
La vita a te debit iö sun,
Mo püch cun chësc me das' de rajun,
Fortüna ciara che te pois me dé."
Mi mai, mia meseria ad ëra ái dit,
Cun edli stlüc ëra á scolté -
Iö l'á bajada y ëra me;
Copé no plü, mo sté bel chît.