Meditazion
| ←Ei parlà co na stéla | Poesie ladine bellunesi 2005 (2005) by Meditazion |
Mute a spietà→ |
ADEODATO PIAZZA NICOLAI
MEDITAZION
É l diese de maio co le zime
de le crode ncora dute bianche
come che fose genaio; na ota
le cuatro stagion le ruaa pi giuste
ades no se sa pì cuanche betese
l capoto o portà le braghe curte,
se dì a ciatà i radice o dì a cazà
i conice. L sol se fa vede senpre
de manco, la pioa ne bianda ogni dì
finché la mufa ne nsemenise. E guai
a chi che se lamenta: i é condanade
a magnase n bocòn de polenta.
Chisà come son ruade a chesto punto
col mondo che va sote sora nveze
de feise l solito girotondo, coi ritme
che dute capía, al posto de chesto casin
che scasína parfin le ruode dei mulin
e nrudinise le spere dei nostre arloie
finché no saon pi se son a luio o febraio
e se vedon l Ajarnola inveze del Tudaio.
(Vigo)