Maria Madalena BAD
Maria Madalena BAD
Y Gejú é jü söla Munt dales Olives.
Y da doman abonora al gnô indô tl tëmpl, y döt le popul é gnü pro ël, y canch' al s' é senté jö al scomenciâ da l' istruí. Mo i scrivans y farisei menâ adalerch pro ël na fomena, che fô stada ciatada en adultere; y ai la fajô iló sté amez. Ai dijô a Gejú: Maester! chësta fomena é stada dër sëgn ciatada söl fat.
Mosé á comané a nos tla lege, che na tara mësson sassiné. Ci che te dijes pro chësc tö?
Mo dijon chësc orôi le porvé, por le podëi acusé. - Mo Gejú s' á plié jö al bas, y scriô cun le dëit söla tera.
Y canch' ai continuâ da le damané, al é lové sö, y á dit ad ëi: Chël de os, che é zënza picé, i tires la pröma pera ados ad ëra.
Y al s' á plié jö indô, y scriô söla tera.
Y canche chi á aldí chësta cossa, ai s' un jô demez un indolater scomencian dal plü vedl cina ai ultims; y Gejú restâ su cun la fomena, che fô iló amez.
Y se derzan sö, al dijô ala fomena: Fomena! Olá é pa chi, che t' á acusé? Ne t' á pa condané degügn?
Ara dijô: degügn, Signur! Y Gejú dijô ad ëra: Ince iö ne te condanëii pa. Vátun y da sëgn inlá ne fá plü piciá.