Manageria-Comunal

From Wikisource
Jump to navigation Jump to search
N vedl iagher by anonim
ladin ampezan
grafia moderna

Manageria Comunal. In risposta a un Monumento a sta Rappresentanza 1873

Anpezane tirà cride
Craià eviva, su ciantà
iu śi- śi- śi no l é da ride
Da stà alegre e da ciantà.

Presto Bepe da ra scora
Bete in moto el canpanon
Vea ra banda, e lumes fora
Voron fei luminazion.

Par la vergine sguaria
Ra m' é śuda inpò delves
Ce contente, ce alegria
Finalmente, inze el paes.

Finalmente r' on spontada
Dopo tanto che on lourà
Su beon… e che ra vada
On fenì de struscià!

Ra miseria ca in Anpezo
R' é fenida par ades
Ce cucagna par un pezo
Ce richeza inze el paes.

On soferto inze tre ane
Duto chel che se pó dì
Santo Dio, cuante malane
'L é ben ora de fenì.

Viva duncue, el noo eviva
Gran consilio comunal
Chel consilio che sortia
Da ra urna eletoral.

E 'es torna una gran bota
Cajo insolito śà dà
Fin ra femenes sta ota
Col concore a ra svoità.

Braa femenes… ai ome
Na lezion i aé śà dà
Aé scelto alcuante tome
Che onor molto i ve farà.

Serà ben che pì de mese
De sta nobil sescion,
No i sà conte, no i sà lieśe
No i sà gnanche fei el so gnon.

Ma ce conta, i cianta un ino,
Co i se struta a ciacolà
E lo spirito del vino
Ra pazienza li darà.

Nos cianton coscì presto
E parduto come ca
Un seralio come chesto
Coscì in ordin conpletà.

Anzi, che canzelaria
Su ra porta l' é Büro
Comunal manegeria
I pó scrie canche i vó.


Tano, Verzi e Barbareles
Presto, presto parecià
Chera cameres pì beles
I cuartiere da fità.

Da levante, da ponente
Vignarà i foreste a grun
Ce ingleses, ce de śente
'L é rinforzo al nosc comun.

Se par vede ra braura
Del seralio comunal
Par conosce ra natura
D' ogni singolo animal.

I fotografe, i pitore
Canche i sente ra novitas
Come mate dute core
Par fei grupo, e par copià.

Costantini, el segretario
Che de ciacola 'l é bon
El concorso straordinario
El pó fei ra spiegazion.


Una tigre amaestrada
'L é ra prim bestia che vedon
Śà noe ane r' on ciapada
Sote un sas in padeon.

Bela bestia pura raza
Ma catia che mai pì.
R' é furiosa, ra sgrinfa ra taza
Ra no taje, in dut el dì.

R' à una burta vardadura
Ra tien i oce senpre basc
Canche ra i alza i fesc paura
Senpre incueta e senza pasc.

El secondo su ra lista
Un stupendo orangotan
'L é una bestia molto trista
Da sta senpre da lontan.

'L à un istinto assai curios
Par na scimia da pipà
Bocia larga, mus pelos
Dente fate par tazà.


Un ouzelato, burto cuco
Vedo el terzo a conparì
'L é un pormai, uzel de stuco
El se crede ci sà ci.

Se conosce dute ormai
De sto uzel ra proprietà
Che de dì el non é mai
E di note, el và in ca e in là.

No 'l é bon in vita soa
Mai inze busc de se ciatà
Ma dei outre inze ra coa
El và senpre a se cuzà.

Eco, un cuarto cocodrilo
Un rarissimo eśenplar
De ra Boite e del Nilo
Molto pratego del mar.

'L é una bestia busarona
Falsa e furba cuanto mai
Ra se fida, e ra par bona
No i śì pede, e se no guai.

Un cian de bela raza
Che da turco el porta el gnon
'L à el pelo longo; 'l é da caza
Molto cuesto ma teston.

Fora anche el mostra i dentes
Ogni fre ch' el ven tocià
Benché el vade de frecuente
Par ra jejes a śirà.

Un bel musc se sente el resto
Col iò iò… a vegnì
Un bel pezo, ma de chesto
Pì in detalio arei da dì.

Finalmente un scarafagio
Vulgo chefar nos vedon
Vegnì avanti adagio, adagio
Col col storto, e con finzion.

'L é arivà sto burto inseto
Diré pura ra verità
Beśen dì che 'l é difeto
Tanto a vende, e a inprestà.

El, par zento, a ra por' śente
De zincuanta, e pì el tol
Co ra zates gentilmente
El i ciapa par el col.

Eco, i mena anche ra volpe
Vecia, fin a śì al so luó
Par menà chi outre tolpe
Par el nas, come ch' i vó.

N outro inseto 'l é ca ancora
Un pormai d' un talaran
Ogni diou i ciata fora
Tante insete, mai chest' an.

'L é anche un brao dromedario
'L é doi zusc, via par inpò
Un capron straordinario
E par ultimo el so bò.

De ste zinche co se sente
Dì che i é besties, basta ben
I é beate, i é contente
Se i à vena, e ben da fen.

Ce sai lore poerete
D' interesse de comun
I stà ferme agnó ch' i bete
I no s' intriga con negun.

Chi outre cuatro, che mancia
'L é parsones come và,
E sun chera ingrata bancia
N' outra ota, i s' à ciatà.

'L é da feise mereea,
Che i no ciape su el trentun
Che i no dighe a r' assenblea
Ve saludo adio Comun.

Mancia, un jato ancora
El seralio a conpletà
Ma 'l é pronto, se i lo dora
El fesc presto a capità.

'L é un gatato, maladeto
Pizo, negro e forestier
'L é stizos, el no stà cieto
El fesc senpre un burto ves.

L é de pescima natura
Come i gate, in general
Chesta bestia r' é segura
Co se trata, de fei mal.

Un gran pezo sarà via
Inz' un busc, el se ne stà
E da i outre in conpagnia
Ra malizia 'l à inparà.

Del so genere el se crede
Un gran gato furbacion
'L é superbo, ma no 'l vede
Che 'l é inveze un gran coion.

Calchedun sostien par zerto
Che di note, el và in ca e in là.
Che pì otes sun un cuerto
El se sconde là a paissà.

Śà sarà chesto gatato
Calche femena i vó ben
Ce voreo? 'L à un gusto mato
Zerta femenes in pien.

Che nosoutre ca in Anpezo
Sone gnauche, beśen dì,
Se son stade boi trenta ane
Chesto gato de sofrì.

Gato me, no te sas nuia
Cuanto pizo che te sos
Lascia là, e bete via
A zertune no te pos.

No ve lascio coscì presto
Ve lo śuro, nolafè
Contentae ades de chesto
El restante el sentirè.

El me disc, che anche el somaro
Chel famos pantalon
El no ebe sentù acaro
Chera prima me canzon.

Par ra me Manegeria
Na risposta el me vó dà
Con un' outra poesia
Da fei propio strabalà.

Te fesc ben, coscì in Anpezo
Te son grate, che mai pì
Parch' on carta, par un pezo
Chel!...afar da se forbì.

Ma procura de fei meo
De fei algo manco mal
N' outra ota tasc te preo
Un poeta da Crasoal.

Ió son anche assei contento
Se te tornes a ralià
Parcé éi un argomento
Par podé te bartaśà.

E che te ebes el corajo
Dà un spetacolo [in] paes,
Pó ben esse, 'l é śà majo
Ra te spiza, 'l é el to mes.

Che te mancia 'l é ben vero
El to gato inperator
Chel amigo, bon sincero
Che tolesc, me a el Signor.

El nosc gato, 'l é śù via
Me despiaje, in verità
Coscì gran manegeria
Ra scomenza a se guastà.

Cuanta lagrimes e piante
In chel dì, che 'l é partì
Poerete dute cuante
'L aon caro, che mai pì.

Anpezane, 'l é ben ora
Che fenide sta canzon
Tabacon, e po finonera
Rezitando sta canzon.

De ra tigres, ra zatades
I dentoi del rangotan
Del somaro ra scalzades
Signor, tien da nos lontan.

Fesc, te preo che 'l scarafagio
El no m' ebe da inpestà
Che pian, pian, adagio, adagio
No 'l me pode roinà.

Fesc, che un cuco ra me coa
El no me posse mai ciatà
El se staghe a ciasa soa
El me lasce a ciantà.

Tien in vita par un pezo
Chesta gran manegeria
Del comun e duto Anpezo
Par el ben, e coscì sia!