lipu kule/ijo lon pi lon ala

←monsutatesu

lipu kule  (2021)  ijo lon pi lon ala by kulupu En

pan sike suwi→

tan lipu lipukule.org/post/2021/02/01/ijo-lon-pi-lon-ala

tenpo mute la, jan li kepeken nasin tawa sona pi ijo lon. nasin ni la, jan li ken sona e ijo lon, li ken pali e ijo kepeken sona, li ken kama e sona sin. tenpo mute la, ni li lon: ijo li lon, anu ijo li powe. ona tu li ken ala lon tenpo sama. ni li nasin sona pi tenpo mute.

taso tenpo sin la, jan sona nasin li open e toki ni: ken la, ni li lon ala. nasin ante ni la, ni li ken: ijo li lon li powe, anu ijo li lon taso, anu ijo li powe taso, anu ijo li powe ala li lon ala. ni li nasa mute tawa jan mute, taso nasin ni li sin ala! tenpo mute la, ona li awen. taso, nasin ni li seme? seme la ijo li ken lon li powe lon tenpo sama? tawa sona pi nasin sona ni la, o kama sona e nasin sona pi tenpo mute: ̨ nasin la, sina pali e ijo la, pali ni li ken pana e ijo sin. ni li pali nasin. o lukin:

ijo li lon; sina wile sona e kule pi ijo ni. ona li ken loje, li ken jelo, li ken walo, li ken pimeja, li ken laso. ona li ken kule mute anu kule wan. ni la, kule li pali nasin.

pali nasin li pana e ijo wan taso la, ona li pali nasin pi pini wan. o lukin:

ijo li lon; sina wile sona e suli pi ijo ni. ona li ken suli taso anu ona li ken lili taso. ni la, suli li pali nasin pi pini wan.

nasin sona pi tenpo mute la, lon li pali nasin pi pini wan. ijo li ken lon taso li ken powe taso. nasin sin la, ni li lon ala. ijo li ken lon, anu ona li ken powe, anu ona li ken lon li powe lon tenpo sama, anu ona li ken lon ala li powe ala lon tenpo sama. nasin ni li nasa!

seme la ijo li ken lon li powe lon tenpo sama? o lukin. mi toki e ni: “toki ni li powe”. toki ni li lon anu powe? ona li lon la, ona li powe. ona li powe la, ona li lon. nasin pi tenpo mute la, ni li pakala e nasin. nasin ni la, ona li lon li powe. pakala ala li lon.

jan li sona ala e nasin ni la, nasin ni li ken nasa mute tawa ona. taso ona li wawa li pona e pakala pi nasin pi tenpo mute.

seme la lon li ken weka? o lukin. mi toki e ni: “jan li jo e len sin lon tenpo kama”. jan li ken ala sona e tenpo kama tan ni: ona li kama ala lon tenpo. ona li lon ala, taso ona li powe ala. lon ona li weka.

jan sona nasin li toki mute e nasin ni, taso nasin ni li kama suli ala tan ni: ona li ante mute tawa nasin pi tenpo mute. jan sona li sona ala e ni: pona pi nasin sin li ken anpa e pona pi nasin pi tenpo mute. ni la, toki utala pi nasin ante li awen.