Libre de Memorias/1388

← 1387

1388 Libre de Memorias

1389 →

L'an MCCCLXXXVIII foron Cossols,

• Senhor Johan de Lagarriga, per Taulas, per avocatz e per Mesies.
• Senhor Ramon Corregie, per Canabasies, Mercadies et Notaris.
• Senhor Peyre Golfi, per Mazel, Pararie et Aludies.
• Senhor Johan Pastre, jove, per Fusties, Lahor et Orgies.
• Senhor Mathieu Rossaut, per Fabres, Coiraties, Sabaties, Monies et Peyralies.

Foron Clavaris.

• Senhor Anthoni de la Garda, per Taulas.
• Senhor Guilhem Vayssa, per Mazel.
• Senhor Jacme Nicholau, per Fusties.

Feron de talha aquel an per testa, un franc.

Pus II patatz per lbr.

Foron levayres de Bans.

• Johan Raynaut, per Canabassies.
• Anric Garoti, per Fabres.

Foron Caritadies.

• Peyre Floyra, per Taulas.
• Bernat Cornelh, per Canabassies.
• Brenguie Cesseno, per Mazel.
• Peyre Rotgie, per Fabres.

Foron Carrayries.

• Johan de Camplonc, per Taulas.
• Johan Bru, per Canabassies.
• Bernat Roquacels, per Mazel.
• Guilhem Espanol, per Fabres.

Aquel an dessus dig, paguet la viela de Bezes e tot lautre pais un subsidi, que era estat endich e empauzat per mossenhor de Berry, lan LXXXVII, un franc e ters per fuoc.

Pus aquel an meteis, paguet la dicha viela e tot lo pais, tres franx per fuoc, que dizie hom e farie entendre que lo comte dArmanhac devia far hoiar las plassas et los lox, que tenian los Engles en Roergue et en autre pais, e los devia gitar foras del Realme de Fransa: mala lag ses enseguit.

Item aquel an mezeis, paguet la dicha viela de Bezes e lautre pais, un autre subsidi de II. franx e quart per fuoc; per loqual ne vendero los senhors Cossols de Bezes lo emolimen del pes del blat e de las farinas; et compret lo, maystre Johan de Betizac, per pres de XVII cen lbr.

Lan dessus dig, MCCCLXXXVIII, dimenge que fo lo V jorn del mes de geli, se sagret la capela de la Mayre de Dieu de pietat, que es en lorde dels Carmes de Bezes, et sagret la lavesque de Malhares, ouc fouc lavesque de Cotzerans, atresso, et fes si mot gran sollempnitat dont lavesque de Malhares hi donet de perdo XL jorns, e mossenhor lavesque de Bezes, autres XL jorns, e mossenhor lavesque de Cotzerans autres XL jorns de veray perdo.