Levip deila

From Wikisource
Jump to navigation Jump to search
Levip deila  (1889) 
by Madarassy Pál

Levip deila.


[ 23 ]

Löfob-la fegolön: äs lulit takedik,
aso suflamom sol fino vävendelo,
das deil rivomös obi ko nam zadik,
das oseflumös blud oba nenotliko.

Löfob-la fegolön: äs stel bal golüdik,
ko stal panebleköl, nidöl lefulniko;
disön leigo in sila dib yulibik,
ko dol vo! nemödik, depubön stiliko.

Löfob-la fegolön: äs väp svidik flola,
kel lüvom gleköpi dekik, pamaniföl,
ed in vüm pelodöl ko smeladins luta
suixänom al God, äs glüsmok lesmoköl.

Löfob-la fegolön: äs töfil nebela,
if rivom omi ko flam nelümik gödel,
e vio ba omi odlinom stol sola:
God! if ädlinol-la lani oba tudel’!

[ 24 ]

Löfob-la fegolön: äs ton aidlemöl,
kel pemotöl fa hap, luti obefulom,
e kel lüvöl stinis, kobotonis jaföl,
gäliko säspidom, ed ali sil xänon

*

Äs lulit takedik leno ofegolol,
leno odepubol, äs stel nidik sila,
leno nefikulo odeilol äs flol,
leno lani ola odlinom stal sola!

Dido ofegolol, no letöl vegedi,
ab büfo misalöf nämis odistukom,
deilön stiliko pagivön te nati:
ag! lad mena pöfik diledo poblekom!