La slites

From Wikisource
Jump to navigation Jump to search
La slites  (1915)  by Jan Batista Ploner
ladin Gherdeina
grafia moderna

1.
Cincin cincin, cincin cincin!
Audide la brunsineres!
La slites vën; cincin cincin,
Ciavei che lusc da stleres.


2.
I vën a trot y a sparon
Da Col dala Pelda ite.
Na pert ie bele ja Pigon,
Prësc passi pa tlo ite.


3.
Ncuei ulons’ a n pue’ i cialé
A chisc che vën n slita:
Sce n ie de tei da maridé
Por via de vel’ desdita.


4.
A tei dëssun fé la sief
y n pue’ i fermé la slita;
Po i dé l cunsëi, che tala Plief
Poi jì a sté si vita.



5.
De burta jëunes schiva n pue’
De jì ncantëur n slita:
Puer’ ëiles: ie danz mila zue
Ad ëiles per si vita.


6.
La beles sënta su tan gën,
Che l per, che les sibe stances;
Ma i disc, che les ie tan reres śën,
Ades sc’ ch’ la mosces blances.


7.
Śën ruveles tlo; unide a udëi!
Unide ca y cialëde;
L ie la slites da Urtijëi;
Cialëi a una al iede.


8.
Ce lingia longia! Tan da jënt!
Ce guanc, che fej paruda!
Blot or y sëida y arjënt,
Gurmei po che stramuda.


9.
L cnëidel ie daniëura mo
N bel ciapel dad ëila;
Ma la cazina uel mpo
Se fé udëi ’nc’ ëila.


10.
I ëis’ a po cialà ai ëi?
L plu cun breies curtes;
Al moto i sà nce a Urtijëi
La longes massa burtes.


11.
Sci sci: la modes da zacan
Vën for mo respetedes;
La nueves vëigun for mudan
y massa prësc zaredes.


12.
Ce bel che l foss, cincin, cincin
Avëi n grum de slites,
Ciavei assé y dut l vin
Dl Lont y no debites.