La scassada busarada
La scassada busarada
Alvije Piccolruaz
1.
La scassada
busarada
ch' â stafé n möt
ch' â spavënt da döt,
finamai dal Giubileo
do la mort dl papa Leo.
Oste l' ascolté?
I ó pa t' la cunté!
2.
Söla sëra
fosc dagnora
feji i ladins
propi da vijins:
ai s' abina y se sënta,
s' la cunta o s' la cianta
sciöche mai se le dá,
fin ch' ai n á assá.
3.
Mo ci moca
sc' ara i toca
ai mituns da jí
debota a dormí
Ai oress aldí na storia
por se mëte a memoria
coch' al vëgn le bau,
ci ch' al fej le diau.
4.
Guai sc' ai alda
bona cialda
na te storia, vé!
Ara ti fej tan me!
Ai s' la mastia y s' la römia
sciöche vidí na peza tömia
y se mët tl ce
cosses che ne n' é.
5.
Vijo Frenes!
Oh ci scenes
ast' mai fat zacan
por n te malan!
Ci che mai la jënt cuntâ
Vijo tosc s' imaginâ.
Coche chësc gnará
sciöche San Micurá.
6.
Dër les sëres,
tó spo, chëres
ch' i fajô spavënt
sc' al ne n' ê pro jënt.
Do le cené y la corona
sciöch' al foss te na morona
stôl iló taché
fin ch' al gnô ciamé.
7.
Chësc martöre
al s' un möres
dala sonn chiló.
Süa uma spo dijô:
Taca sö la camejöla
y les cialzes da ciampanela!
Vátun sëgn sön let
por lové dales set.
8.
Ci sciosciüre
che chël mure
fej insnöt tl sonn!
Süa uma dij al om:
I á dormí bel püch y nia.
Sëgn, vé, mënel bele la rejia.
Co minest' mo tö,
Dessi bëgn jí sö?
9.
(Le pere:) Pan da müfa
pro la jüfa
i á fosc fat tan me,
ch' al te mëss cherdé.
N' aldest', uma, coch' al scraia,
coch' al ürla, coch' al svaia
corassö sorënt?
Salt' sö iö denant!
10.
(La uma:) Vad' atira
bel lisiera
por ne descedé
chi che mëss palsé.
I ó pa le fá pluré la süa,
l' ó pa spo mené te stüa.
N' é pa nia da rí!
Fosc ch' al [n'] é val' de ri!
11.
Cun morvëia
y ria vëia
Saltera ëra snel
sö, sciöche n vicel.
Ara vá y scuta chit chit.
Ara stá y ciara fit fit.
Mo ci riüda, vé,
ch' ëra spo se dê!
12.
Giubileo,
Giubileo,
ne me trá pro i pîsc!
chël pür' Vijo dij.
N' ó pa plü diau o mostri,
tlo pa dí bel paternostri!
I ó pa dër lauré,
mai plü santoré!
13.
Y la uma
spo ne jöma
- sciöch' ar' â rajun -
de ti dé le reflun:
Möt, ci dijeste dl Giubileo?
Che ne te dodes tö - eo!
Este propi n mot,
un de Spapa dessot?
14.
(Le Vijo:) Os ponsede
y dijede
ci ch' orëis, por me!
L' á pa iö porvé!
Na compagna trascassada
mai, no mai m' é gnüda dada!
Döt é plü saurí,
finamai morí.
15.
Sta scassada
giubilada
i á mo fat tan bëgn,
ch' al confessa sëgn:
Mefodër le Giubileo
m' á amainé sciöche Saul Ebreo,
spo de n stletorin
fat n capuzin.