La net de Madoines

From Wikisource
Jump to navigation Jump to search
La net de Madoines  (1884)  by Angelo Trebo
badiot Mareo
grafia moderna

La net de Madoines.

Tres i frassi sciüra l'ont,
mëna encërch i floc de nëi.
Scür dla net co fej spaont!
Dlunch encërch dla mort le pëi!

Na ciuita tlo y enló,
con dui edli desco n iat,
jorera sön n lën dampró
y te ciara desco n mat!

Te chës ciases él la löm.
Jont ne n'é ciamó a dormí.
Düc s'abina sën adöm
a Madoines sën da jí.

Sën te n iade lominus
vëgnel, chit scuta l'ont!
Dlizerenn spo fora por chi trus
vëigon desco or y arjont.

Tres i nii la löna vën
fora y nes mostra spo
cion morvëies bën
sön chës dlaces tlo y enló.

Con n sonn tan bel morjel
chërda les ciampanes döt ladin,
düc adöm a odëi le bel,
düc ad adoré n bambin.

Te na ciasa dorm bel su
sën tan bel te n let bun cialt
n te picio viadú -
sën te n iade ríel dadalt.

Angeli ciantenn a ci
aldel y dër bel sonenn.
Mai ne n'ál ciamó aldí,
mai ciamó tan bel ciantenn.

Da finestra ete sën
lominus la löna dá.
L'angelo custode vën
jö dal ci y dlungia stá.

"Oma!", chërdel dër daplan,
"oma, vëgnel prësc la de?
Oma! Él sogü endoman,
oma, oma, él Nadé?"

Sön so müs bel rost y blanch
so custode n baje i dá:
"Scuta", dijel dër daplan,
"dorm! Nadé endoman sará."

Prësc do n püch la oma vën,
ciara atira do so fi.
Ci ligrëza ára sën,
che le picio dorm saurí.