La ciacia

From Wikisource
Jump to navigation Jump to search
La ciacia  (1885)  by Jan Batista Alton
Ladin da Calfosch
grafia moderna

da Rimes Ladines


La ciacia.

Aló, aló, mituns, impé!
Gosted' dër bëgn y dër assá!
Osc stlop spo atira söl spiné,
Ince val' toled' por i massalá!

Aló, aló, mituns, piun ia!
La scurité ne nes temuns';
Te pëgnes, te poc, te sassaria
Ince sce tomun, plü rí oruns'.

Aló, aló, mituns, ci mai?
Ciodí ciaré a chisc sassuns?
Sö, sö bel dërt cun dër bun tai!
Degügn n'á tëma da pedruns.

Aló, aló, mituns, bel snel!
Les pizes vëigon slominan;
Ciaré n' ciarede a chël vicel!
Te salverjins lasciuns' pa ion.

Aló, aló, mituns, alalt!
Infré ch'arëis bëgn üsc cialzá
Toled' la maza cun le bun tlalt,
Pested' tla dlacia bëgn sigurá!

Da bisca sî fat nosc stradun
Insö por chësc parëi dlacé!
Ciared' insö, mai vers le valun,
Sce n'orëis jö por le dlaciun tacé.

Bi chic, bi chic, mituns, sentess'!
Palsé messuns' y conscidré;
L'altëza, ch'un, comé odëis,
Valgügn chiló röia bëgn dainré.

Bi chic, bi chic, mituns, palsed'!
Lasced', che le vënt incër nos sofl'!
Chësc gonfedé ne ves temed',
Chiló la flascia y spo n bun sofl!

Bi chic, bi chic, mituns, bel plan!
Odëis iló sön chël gran piz?
Al pé n cogol mo no te n plan -
N ciamurc odëis cun cor' dër spiz.

Bel plan, bel plan, mituns, ascolted'!
Francësch, Ojep, lapró 'ci Jan,
Os jëis bel plan sot ia; ciared',
Ch'ël n'aldes osc var o se vëigh' foman!

Tres plan, tres plan, mituns, tres plan!
Rová che sarëis a i trá ia delá,
Vaghede le colp bel sëch y gran!
Tochëis, él dërt, scenó vëgnel ca.

Tö, Vijo y Sepl, pu ma bi chic!
Cüfess chiló tla büja düc!
Ara é bel vërda y zënza schic,
Restun bi nëc y dër bi süc.


pagina:64
Tolede osc ro, metele söl edl,
De vista perd' i nüsc n' poduns',
Ci ch'an ne crëi, datrai sozedel,
Mo che döt vad' bëgn speré oruns'.

Aldid'! pum pum! dui colp án trac,
Le ciamurc copé y destenü;
Mo, o mi bun Dî, ciared' chi mac
Ch'impede gní sö vëgn iló jö!

Iló te chël banch bel vërt tl crëp
Odü cez ái, chësc vëigon tler;
Ciaré ne ciari al zop tan sëch
Iló te chël bur y gran infer.

Dessot, dessura, dlun' crepuns,
Ch'al sgricia bel a ciaré pro!
Lajö dessot chi gran valuns!
De forza de man me toma le ro.

Mo vé! sëgn frëmi, ciara sö
Por chël parëi, ci vëighi mai?
Ch'al nes sozed' gran mal incö,
Me tëmi dër; ciared'! ai, ai!

Dui gran variöi sitá te m'i é
Cun grifes, ares, bech te n iad',
Düc trëi i compagns i á sëgn al ce,
Temëi me tëmi ch'ëi s'un vais.

O mi bun Dî, döt é pordü!
Ch'ëi é bel ciurns, sëgn vëighi tler;
De vigni vers y sö y injö
Saltan i vëighi te chël infer.

O ci spavënt, döt é finí!
Sparis cun scrai dër bur salvare
Tomá dal alt insciöche agní
Ch'amez a n crëp se fala le vare!

O sëgn, bi chic, mituns, bi chic!
A tera düc! periund' por ëi,
Che chël bel Dî i relasce i debic!
Chësc é mi su y bun consëi.