La chiena de Gherdëina

From Wikisource
Jump to navigation Jump to search
La chiena de Gherdëina  (1921)  by Leo Runggaldier
ladin Gherdeina
grafia moderna

La chiena de Gherdëina.


Ciantia metuda adum da Leo Runggaldier

Via Maciaconi
Ulache la fej giauloni,
Jide sun su aut
Cun la musa for mpontaut.
Cialëde sun chi pic,
Cialëde po cie vic.

Śën gëura po su l usc,
Ruvon ite te n busch;
Po iel pa dut bel chiet,
Sche n fossa bel a liet.
Nia ne se muef,
Sta ca sche da nuef.

Mpo iel dut vivanda
Sibe lën o sibe banda
D'aier o d'albric
Ados te vëniel sgric.
Gëures su la musa,
Te sautel su na giandluja.

Jënt iló strandleda
Sun parëi mbrucëda
La lënga dedora ju
I snauzeri mponta su.
Dal frëit a di d'anda Talina
Giatun mo pel de gialina.

Na nibla iló de sboc
De ntieres y de roc,
Bec iló castrec
Fac de lën de pec.
Sce n soffla it' te n cucuch
Audun cuch cuch cuch.

Bulëures y cëures
Che fej d'uni lëures
Giac y musciac
Che fej d'uni ac.
Gialines y talpines
Se sauta it' tla tlines.

Auces y aucons
Corves y ciauscions,
Punjins y curnacins
Cun codes
da buchins
Purciei i vadiei
Cun biesches y aniei.

Brunsins y brunsineles
Ciampanes i ciampaneles
Lingioles y giajoles
Vesoles te tercioles.
Gimpli y pimperli
Semea plu tei mincherli.

N pastrec iló de bec
No os, no pel, y sec;
Cree iló biei bloc
Semea plu bagoc,
Cun cëira i fulminanc
Sauti su sche manc.

Sce n ti dà po' na drucheda,
Doite na sufleda
Po' audun n bel scibl
Che śëna propi tribel.
Sce n tira po' te n spech
Po' audun tech, tech, tech.


Na vacia che cinia
It' per na crinia,
Un che la mëuj
Y stridla ju cul bëusc
La condla ie per finta
N catl dala tinta.

N ciaval iló y n'afa
Da n fust furà te tafa
La giames sche n saioch
La vita sche n maioch,
Sbriscia su per n zetel
Y culeta po' sche 1 petl.

Te stalot n gran purcel
Che roncia ju te n pel
Sot tl sterdum
Snortla tl chetum.
Te ciapin y te ciapotl
Cun na pinta y n batotl.

Malans che spuda fuech
Na lenga sche n prestuech
Dlongia mo tei mandli
Paiazi dut n zandli.
I sona duc tamburdli
I tira de drë gran urdli

La lesures ie de pel
De manz o de vadel,
Se scana dut se storj
Se spana dut se ntorj.
L vënter plën de paia
Sut piet na gran bedaia.

Zopes de popes,
Giames da gropes,
Masseles sche puni
Cuecenes sche runi
Badli sche padli
Piesc sche redabli.

Doi tlo maridei
Se tol per i ciavei,
Cun na pela dal pan
Se dai po stlefan.
Cun tibli, tapli y tumbli
Se fieri mo do cun fumbli.

Sce n ti dà po' na sbingheda
A na codla ch' ie tacheda,
Cinia n musciat
Cun coda y cumat,
Tira mo de pe
I maia po' leché.

Dut jola, sauta y śëna,
Rena bredla y stema,
Zera, sgrafla y ficia
Fora rafa y picia.
Bala, bula, baia,
Bloca, rota y maia.

Sce ulëis udëi la chiena
Na zopa o na biena
Na cëria o n ceston
Na zuma o n vagon
Jide ja Zenz de Levisc
Giatëis dut chël che i disc.