La Bregostana sa Palua
La Bregostana sa Palua
Na pìciola la era jita ju da le vace a dabirar. Ca da Palua l'é vegnù na bregostana e l'à brancà sta beza e la l'à portada fin te busc vin Palua. Canche so mare à vedù, che so beza no la vegn, l'à dit a el: "La pìciola no la é amò chiò, crese che la bregostana la ne l'à portada vin Palua. Va a chierirla." E el se à tout n cian te sach e l'é jit via. La bregostana, che l l'à vedù vegnir, la l'à domanà: "Che porteste po, n cian, e?" L'om à dit: "Na, na, porte n ciuch a meter te fornel." L'é jit sun dò n pecel e l'à lascià fora l cian e la bregostana la é sciampada te chel busc. L cian l'é sutà dò e l l'à sbregada sù n mile toc. L'om se à tout la pìciola e l l'à menada a ciasa e sa mare ge à fat n bon zapolà de smauz.