La .alis. cizra je cinri zukte vi le selmacygu'e/remo'o

From Wikisource
Jump to navigation Jump to search
la .alis. cizra je cinri zukte vi le selmacygu'e by Lewis Caroll, translated by la .lojbangirz.
remo'o le se klaku lalxu



i lu cizra je za'uzra sei la alis krixa to abu tai se spaji ja'e le nu ze'a tolmorji le nu ta'i makau tavla bau le drani lojbo toi i caku mi se tolplo tai tu'a lo'e brarai darvistci i co'o jamfu tosa'a ca le nu abu catlu lei jamfu kei jy simlu le ka jibni le ka na ka'e se viska kei kei ki'u le nu ca'o binxo lo tai darno toi i uu doi cmalu jamfu ma do ba dasygau lei cutci ku joi lei do smoka doi dirba i ju'o mi ba na ka'e go'i i mi ba mutce dukse le ka darno do kei le nu kurji do i ko renvi ta'i le do xagrai selka'e i ku'i ei mi jy xendo sei la alis pensi i va'o da'i na'ebo la'e di'u ju'ocu'i jy na cadzu veka'a le mi se djica i ua ai mi dunda ca ro cevjbetersla lo cnino cutci remei li'u


i abu ca'o platu le nu co'e ta'i makau i lu ei lei cutci cu se mrilu sei abu pensi i ba xajmi fa le nu benji loi seldu'a le vo'a jamfu i ua le judri ba simlu le ka cizra i lu


                  le selsi'a ke pritu jamfu be la alis
                      bu'u la fagzda lolgai
                          ne'a le fagzu'i
                               to la alis prami benji toi


li'u i ue mi bebna tavla li'u


i caku le abu stedu cu janli le drudi be le kumfa i je'u abu ca mitre za'u li repimu i abu ze'i lebna le cmalu ke solji ckiku gi'e sutra klama le purdi vorme


i la alis uu zo'u le nu mlana vreta gi'e catlu le purdi sepi'o pa kanla cu jimte lei se zukte le ka abu kakne ce'u i le nu pagre cu nalcumki traji i abu zutse gi'e za'ure'u co'a klaku


i lu ei do ckeji sei la alis cusku i do barda nixli tosa'a ju'o drani toi i i'enai ca'o tai klaku i le'o ko ca sisti li'u i ku'i abu za'o klaku loi litce be li so'i ja'e le nu abu se sruri lo barda lalxu noi centre li ji'ipano le ka condi kei gi'e preja le xadba be le kumfa


i bazaku abu tirna lo nu cmalu stapa le darno kei gi'e sutra le nu sudgau lei kanla tezu'e le nu viska le nu makau klama i klama fa la blabi ractu noi xruti gi'e melbi dasni gi'e jgari lo blabi ke kanba gluta remei ku fa'u lo barda bifpra le re xance i ry sutra bajra klama gi'e sezysku lu oi la noltroni'u zo'u ba'a ny ba cilce fengu va'o le nu mi gasnu le nu ny denpa li'u i la alis tai cinmo le nu tolpacna kei ja'e le nu bredi le nu cpedu lo'e nunsidju makau iseki'ubo abu ca le nu la ractu cu jibni cu co'a cusku sepi'o lo lauble je toldarsi voksa lu pe'u doi ractu li'u i la ractu cu suksa se jenca gi'e falcru lei blabi ke kanba gluta e le bifpra gi'e bajra mo'ine'i le manku serai le ka sutra


i la alis cu lebna le bifpra e lei gluta gi'e co'a pilno by mu'i le nu le kumfa cu glare kei ze'a le nu ca'o cusku lu oi ue roda cizra ca le cabdei i ca le purlamdei roda fadni fasnu i mi kucli le du'u xukau da galfi mi ca le nicte i ei mi pensi i xu mi mi mintu ca le nu mi cikna binxo ca le zi cerni i pe'iru'e ba'anai mi cinmo le nu mi frica milxe i ku'i va'o le nu mi mi na mintu cu jersi preti fa le du'u mi du makau i la'e di'u cu barda nabmi li'u i abu co'a pensi ro le verba poi ke'a abu slabu gi'e mintu le ka nanca ku'o tezu'e le nu jdice le du'u xukau cumki fa le nu ba'o galfi abuboi su'oboi vy


i lu ju'o mi na du la adas sei abu cusku iki'ubo ge le abu kerfa cu clani sarlu gi le memimoi cu nasai sarlu i ji'a ju'o mi na du la mabel iki'ubo ge mi djuno so'i vrici gi my y djuno lo tolmutce i ji'a ge my du my gi mi du mi i oi ue roda cfipu i mi mi cipygau le ka ca djuno roda poi mi pu djuno i pilji li vo li mu fa li pare i pilji li vo li xa fa li paci i pilji li vo li ze fa -- i oi mi ba noroi snada tu'a li reno va'o le nu tai masno i ku'i le pilji porsi na vajni i e'u troci tu'a le tedyske i la londn raltca la paris i la paris raltca la romas i la romas sa la'e di'u naldrani ju'o i ju'o pu galfi mi la mabel i mi troci le nu cusku lu ua le cmalu li'u li'u i abu punji lei kruca xance lei tuple tai lo'e nu cusku lo se cilre kei gi'e co'a sitsku i ku'i le voksa cu se sance lo rufsu je cizra i lei valsi na mintu le se tcaci



                  i ua le cmalu krokodilo
                    cu zengau le ky rebla
                  si'u le djacu pe la nilos
                    le ka camri'ojvebla

                  i ua lei jgalu ja'a tinsa
                    je cnici preja panra
                  i lei cmafi'e cu se rinsa
                    le cisma xedja ganra


i lu ju'o lei valsi na drani sei la alis uu cusku li'u i lei abu kanla cu za'ure'u tisna loi se klaku ca le nu di'a cusku lu ja'o mi du la mabel i mi ba bilga le nu xabju le pindi ke cmalu zdani gi'e ponse ji'ino selkei gi'e oi cilre so'isai da i ai na go'i i mi mu'o jdice le du'u mi ganai du la mabel gi stali ti i noda ba prali lei bartu prenu le nu py setca le stedu ti gi'e cusku lu ko barkla doi dirba li'u i mi ba fa'aga'u catlu gi'e cusku lu pau mi du ma i pamai ko mi jungau la'e di'u ibabo mi va'o le nu nelci le nu du makau cu barkla i va'o le nu na nelci cu denpa ti le nu mi drata li'u i ku'i oi sei la alis suksa klaku krica i au su'o da ca'a setca le stedu ti i mi tai titpa le nu mi ti nonkansa li'u


i abu ca le nu cusku di'u cu fa'ani'a catlu le abu xance gi'e se spaji le nu viska le nu abu pu co'a dasni pa le cmalu ke blabi ke kanba gluta pe la ractu ze'a le nu tavla i lu mi kakne ti ma sei abu pensi i ja'o mi za'ure'u jdika le ka barda li'u i abu sa'irbi'o gi'e klama le jubme tezu'e le nu sezmerli fi jy i facki le du'u ca centre li ji'imuno gi'e sutra le nu ca'o jdika i bazi facki le du'u rinka la'e di'u fa le nu jgari le bifpra i sutra falcru by puzi le nu mo'usai jdika


i lu jibni rivbi sei la alis noi tolmilxe le ka terpa le nu suksa cenba kei kei gi'e ku'i mutce le ka gleki le nu ca'o zasti cu cusku i e'e caku mi klama le purdi li'u i abu bajra serai le ka sutra kei fa'a le cmalu vorme i ku'i oidai le cmalu vorme cu za'ure'u ganlo i le cmalu ke solji ckiku za'ure'u vreta le blaci jubme i lu le tcini roda xlamau sei le se kecti verba cu pensi iki'ubo mi noroi pu cmalu tai ti i noroi i ju'a ty mutce le ka xlali je'u li'u


i ca le nu abu cusku lei di'u valsi kei le abu jamfu cu sakli i baziku lo nu jaurjanli zo'u le jmaji'o bi'i firji'o be abu cu jinru lo silna djacu i pamoi sidbo fa le nu abu ba'o farlu le xamsi i lu va'o la'e di'u mi ka'e xrukla fu le trene sei abu sezysku li'u to la alis pu klama le xamsi korbi paroi le nunjmive gi'eja'ebo jinvi le du'u ro pagbu be le glico korbi cu se zvati so'o jinru minji noi nenri le xamsi ku'o e so'o verba noi kakpa lo canre le loldi lo mudri canpa ku'o e lo porsi be fi loi ginka be'o e lo trene tcana noi trixe py toi i ku'i bazi abu sanji le nu abu jinru le lalxu pe lei abu se klaku be ca le nu mitre li repimu


i lu au mi na pu klaku lo tai mutce sei la alis ca le nu limna gi'e troci le nu tolcri lo bartu pluta cu cusku i ru'a sfasa mi la'e di'u le nu mrobi'o jinru lei mi se klaku i ju'o la'e di'u ba cizra i ku'i roda cizra ca le cabdei li'u


i caku abu tirna le nu da jaurjanli bu'u le lalxu zaku i abu jbize'a limna tezu'e le nu zgana le nu da mokau i pamai abu jinvi le du'u da odbenu ja rirxyxirma i ku'i remai abu morji le nu abu makau ca mitre kei gi'e bazi viska le nu da smacu po'o gi'e mintu abu le ka pu sakli


i lu xu da mi prali sei la alis pensi le nu tavla le vi smacu i roda bu'u le cnita cu tai tolfadni ja'e le nu pe'i lakne fa le nu ta ka'e tavla iseju noda mi tolprali le nu troci li'u i seki'uku abu co'a co'e lu doi smacu xu do se slabu le pluta be le bartu be le bu'u lalxu i mi mutce le ka tatpi le nu ru'u limna doi smacu li'u to la alis pu jinvi le du'u ju'o ta drani le ka tadji lo'e nu tavla lo smacu i abu boi noroi pu zukte lo simsa gi'eku'i morji le nu tcidu fi le latmo gerna cukta pe le bruna fe lo'u lo smacu -- sera'a lo smacu -- seka'a lo smacu -- ri'i lo smacu -- doi smacu le'u i le smacu cu terpreti mutce catlu abu gi'e simlu le ka rinsa fi le nu ze'i ga'orgau pa le cmalu kanla i ku'i sy cusku noda



i cumki fa le nu ta na se bangu le lojbo sei la alis pensi i ru'a ta fraso smacu gi'e kansa la uiliam no'u le jamji'a le nu klama ti li'u to abu djuno piso'ida lei purcedra gi'eku'i na mutce le ka jimpe le du'u py pu fasnu za makau toi i abuboi za'ure'u co'a cusku zoi fy Où est ma chatte? fy noi pamoi lei jufra pe le abu fraso ve cilre cukta i le smacu cu suksa plipe le bartu be le djacu gi'e simlu le ka desku le nu terpa i lu oise'i ko mi fraxu sei la alis noi xersmadi le du'u abu crogau le danlu le cnirango cu sutra krixa i mi mulno le ka tolmorji le nu do na nelci lo'e mlatu li'u


i lu na nelci lo'e mlatu sei la smacu cu kinli je cinmo voksa krixa i xu ba'e do nelci lo'e mlatu va'o le nu da'i do me mi li'u


i lu y la'anai sei la alis surgau tonga cusku i ko na fengu i ku'i au mi ka'e jarco le mi'a mlatu no'u la dinas do i pe'i do co'a nelci lo'e mlatu va'o le nu da'i do dy viska i dy tai dirba smaji sei la alis tecu'uru'e le sevzi ca le nu lazni limna le lalxu ca'o co'e i dy melbi cmoni zutse ne'a le fagri gi'e tacpe'u le dy xance gi'e lumci le dy flira i dy tai pluka ranti le nu kujyjai i dy tai certu le nu kavbu lo'e smacu i oise'i ko mi fraxu sei la alis noi birti le du'u la smacu noi caku tinsa cu je'u cnicro cu za'ure'u krixa i mi'o dy na ba di'a casnu va'o le nu do zmanei li'u


i lu zo mi'o ue sei la smacu noi da bi'i le jipno be le ke'a rebla cu desku cu krixa i ju'onaicai mi casnu lo simsa i le mi lanzu ze'e xebni lo'e mlatu i rigni je tolba'i je malfadni danlu i e'u mi na za'ure'u tirna le cmene li'u


i lu vi'osai sei la alis noi sutra le nu galfi le selsnu cu cusku i xu y xu do y nelci y lo'e gerku li'u i la smacu na spuda iseki'ubo la alis ca'o cusku lu lo melbi ke cmalu gerku noi xabju le jibni be le mi'a zdani zo'u mi djica le nu mi gy do jarco i gy cmalu gerku la terier gi'e se kerfa lo clani je sarlu je bunre gi'e xrubei lei dacti poi do renro i gy fa'aga'u zutse gi'e cpedu le sanmi gi'e zukte so'i vrici noi mi ka'enai morji pimu lu'o ke'a i gy se ponse lo te cange noi xusra le du'u gy tai se pilno ja'e le nu gy se vamji lo rupnu be li panono i cy xusra le du'u gy catra ro le ratcu i oise'i sei la alis xenru tonga krixa i mi xersmadi le du'u mi ta za'ure'u cnixai li'u i la smacu ca'o limna to'o abu serai le ka vlipa kei gi'e mutce le ka kalsygau le lalxu ca le nu klama


i abu xutla trisku lu doi smacu dirba ko za'ure'u xruti i nu'edo'u mi'o ba casnu genai lo'e mlatu ginaiji'a lo'e gerku va'o le nu do na nelci li'u i ca le nu la smacu di'u tirna kei sy dutselfarbi'o gi'e masno limna xruti abu i le flira cu mutce le ka blabi to ja'e le nu cinmo sei la alis pensi toi i sy lauble je desku voksa cusku lu e'u mi'o klama le korbi ibabo mi do jungau le mi lisri i do ba jimpe le du'u makau krinu le nu mi xebni lo'e mlatu e lo'e gerku li'u


i ca mapti tcika le nu cliva kei ki'u le nu le lalxu ca'o tisna loi cipni ku joi loi danlu vu'o poi ba'o farlu ly i la datka la cipnrdodo la cipnrlori la cipnrxakuila so'o drata noi vrici je cizra danlu i la alis lidne i piro le girzu cu limna seka'a le korbi