La .alis. cizra je cinri zukte vi le selmacygu'e/cimo'o
| ←remo'o | la .alis. cizra je cinri zukte vi le selmacygu'e by , translated by la .lojbangirz. cimo'o le me la kaukus nu bajra jivna e le clani lisri |
vomo'o→ |
i je'u cizra simlu gunma co jmaji le se rirxe i lei cipni zo'u
le pimlu cu dandu i lei danlu zo'u le kerfa cu jibni snipa
i le romei zo'u cilmo carmi gi'e fengu gi'e na'e kufra
i le pamoi co preti cu li'a du'u ta'i makau za'ure'u sudga i casnu la'edi'u
ibabo zi lo mentu be li so'u cu simlu le ka rarna kei fa le nu la alis
ca'o pendo tavla le romei tai le nu da'i abu se slabu ra ze'a le nu abu
jmive i je'u abu pu ze'u daupro la cipnrlori noi uo badri
carna gi'e cusku lu mi do tolcitmau gi'eja'ebo
junmau li'u po'o i la'e di'u zo'u la alis na curmi secau le nu
djuno le du'u ly nanca makau i ki'u le nu la cipnrlori cu je'a tolsarxe
le nu cusku le du'u ly makau nanca cu na se sumji se cusku
i uo la smacu noi simlu co catni le romei cu krixa lu ko zutse doi rodo
gi'e tinju'i mi i ba'e mi bazi sudgau do li'u i le romei cazi zutse
gi'e barda djine co se midju la smacu i la alis ca'o xanka catlu sy
ki'u le nu abu birti le du'u co'a bilma bai le nu na sudga baziku
i lu ta'a sei la smacu cu vajni simlu cusku i xu ro do bredi i la'edi'e
cu sudrai piro loi se djuno be mi i ro ko smaji e'o i lu la uiliam poi
jamji'a zi'e noi le jdaralpre cu zanru le jamna te zukte be fi ke'a
cu ze'i trubi'o loi glepre noi ke'a turni djica gi'e pu mutce co se
tcaci le nu trubasti je jamji'a i la eduin joi la morkar vu'ono'u lei
turni be la mersias fa'u la nortumbrias li'u li'u
i lu o'unai sei la cipnrlori cu cusku je desku li'u
i lu ke'ope'u sei la smacu cu cusku je frumu jekeku'i clite mutce
i xu do cusku li'u
i lu mi na go'i sei la cipnrlori cu sutra co cusku li'u
i lu mi pu jinvi le du'u ja'a go'i sei la smacu cu cusku i mi di'a cusku
i lu la eduin joi la morkar vu'ono'u lei turni be la mersias fa'u la
nortumbrias cu xusra seva'u ubu ije la stigand ji'asai no'u le naijgi
ke ralju jdagidva pe la kanterburis cu facki fi da fe le du'u se djica
li'u li'u
i lu facki fi ba'e ma sei la datka cu cusku li'u
i lu lu facki fi ba'e da li'u sei la smacu cu spudu co fengu milxe
i li'a do djuno le du'u zo da sinxa makau li'u
i lu mi ja'a djuno le du'u zo da sinxa makau kei ca le nu mi facki
sei la datka cu cusku fi da noi so'eroi banfi ja curnu i le preti
zo'u fi ma facki fa le ralju jdagidva li'u
i la smacu na sanji le di'u preti ije sutra co xruti cusku lu lu facki
fi da fe le du'u se djica fa le nu kansa la edgar atelin le nu
penmi la uiliam gi'e friti fi ubu fe le nu turni i le nuntra be la uiliam
ca le nu cfari cu fadni i ku'i le nuntolclite be lai norman ne ubu li'u
i pei doi do iu sei sy ca'o cusku jecabo carcra be la alis li'u
i lu cilmo du'i le nu pu cilmo sei la alis badri cusku i simlu
le ka nasai sudgau mi li'u
i lu iseki'ubo sei la dodos junri cusku co sa'irbi'o be fi lei tuple
mi stidi le du'u le nu penmi
cu se tolcfari'i tezu'e le nu nalmocteicau plicu'a lo tolcadmau
daftadji li'u
i lu ko tavla bau la lojban sei la cipnrxakuila cifnu cu cusku i mi
na se slabu le smuni be su'opimu lei di'u clani valsi ije pe'i do ji'a
na go'i li'u i la cipnrxakuila cifnu cu krogau
le stedu mu'i le nu mipri le nu cisma i pisu'o lei drata cipni
cu mi'amli co se tirna
i lu mi pupu'o cusku sei la dodos se xrani cusku le se du'u
le traji be le ka se jalge le nu sudgau mi'o cu me la kaukus nu bajra
jivni li'u
i lu ki'a me la kaukus nu bajra jivni sei la alis cusku li'u i abu
na'e mutce co djica le nu djuno i ku'i la dodos pu denpa tai
le nu dy jinvi le du'u ba'e da ei tavla ije no drata pu simlu le ka
djica le nu cusku de
i lu je'u sei la dodos cusku le xagrai co ciksi tadji cu nu zukte li'u
to ji'a ki'uda'i le nu do ji'a djica co troci ca lo dunra donri
kei mi cusku le sedu'u la dodos zukte makau toi
i pamai dy finti lei sinxa be le nunbajra pluta be'o noi cukla milxe
to le satci tarmi na vajni sei dy cusku toi ibabo punji le romei
le pluta vifa'uvaku i cusku no lu i pa i re i ci i ko bajra
li'u i ku'i co'a bajra ca le nu djica ije co'u bajra ca la nu djica
iseki'ubo na frili fa le nu djuno le du'u mo'u makau bajra jivni
i ku'i ca le nu ba'o bajra ze'a lo cacra be li pimuji'i gi'e za'ure'u
je'a sudga kei la dodos spaji kixsku lu le nu jivni cu mulno li'u
i le romei cu denmi sanli gi'e vasxu mutce gi'e te preti fi
lu ku'i ma jinga li'u
i le di'u preti zo'u la dodos na kakne co danfu secau le nu pensi
mutce ije dy ze'u zutse fau le nu pa degji cu danre le firgapru kei
to le se tarmi be la ceikspir bei va'o lei pixra be ri toi
ca le nu lei drata cu denpa je smaji i uo la dodos cusku lu
ba'e ro da cu jinga ije ei ro da se cnemu li'u
i lu ku'i ma dunda le se jinga sei le voksa so'imei cu te preti li'u
i lu li'a ba'e ta li'u se cusku la dodos noi sinxa la alis
sepi'o pa degji ije le romei bazi denmi je sanli je sruri abu
gi'e se cfipu kixsku lu au se jinga i au se jinga li'u
i la alis cu na milxe ji'asai co djuno le du'u ei zukte makau ije ki'u
le nu dunku kei abu punji le xance le daski ije vimcu le bi'u tanxe
be lei titydja to u'a le silna djacu na pagre le tanxe le nenri toi
gi'e fairgau lei titydja lei jinga i satci fa le nu ro zvati
cu te dunda pa titydja
i lu ku'i ei dunda lo se jinga ba'e ta li'a sei la smacu cu cusku li'u
i lu li'a sei la dodos cu spuda co junri i do ponse ma poi drata zi'epe
ne'i le do daski sei dy jmina cusku je carcra be la alis li'u
i lu lo tajgai po'o sei la alis badri cusku li'u
i lu ko ta mi dunda sei la dodos cusku li'u
ibabo le romei cu za'ure'u denmi je sruri abu ca le nu la dodos junri
dunda le tajgai gi'e cusku lu mi'a pikci do le nu do cpasarxe
le vi melbi tajgai li'u ije ca le nu dy mo'u cusku le tordu se cusku
kei le romei cu geirkrixa
i la alis cu jinvi le du'u piro le tcini cu mutce co cizra i ku'i le
romei cu simlu le ka junri kei ja'e le nu abu na darsi le nu cmila
i ji'a abu ki'u le nu na sanji le du'u ei cusku makau cu
krobi'o rinsa gi'e lebna le tajgai serai le ka junri simlu
i le bavla'i cu nu citka lei titydja i le go'i cu rinka lo nu savru gi'e
cfipu kei ki'u le nu lei barda cipni cu pante le nu na kakne le nu
vu'irga'e le mebycy.moi kei kei e le nu lei cmalu cu nandu vasxu gi'e
nitcu le nu se darxi fo le trixe i ku'i fanmo uo ije le romei cu za'ure'u
zutse co djine gi'e pikci la smacu le nu di'a cusku
i lu do nupre le nu cusku le citri be do sei la alis cusku e le du'u ki'u makau do xebni y my e gy li'u seke jmina cusku abu noi smaji gi'e terpa ru'e le nu da'i sy se xrani za'ure'uku
i lu le lisri pe mi cu clani je se badri sei la smacu cu cusku je carcra be
la alis je dricmo li'u
i lu clani je'u linsi sei la alis cusku co manci catlu be le rebla be la
smacu i ku'i ki'u ma do ly mi'a skicu le ka se badri li'u i abu ca'o manci
la'e di'u ca le nu la smacu cu cusku ja'e le nu le abu sidbo be le rebla
linsi cu simsa di'e
<!-- la fengu cu cusku --> <!-- fi lo smacu poi --> <!-- fy penmi fi le zdani --> <!-- fe lu e'u --> <!-- mi'o klama le flalu --> <!-- i ai mi flapro do i e'u --> <!-- mi na tolsarxe zanru -->
la fengu lo smacu
noi fy ke'a
cpacu cu
penmi le
zdani i
fy di'e
jungasnu
i i'a no
proki'u i ei
flajvisi'u
i ca le ca
cerni no
drata cu
fasnu
i e'o mi
farlu
sei le smacu
cu darlu i
secau lo
pairkamni
li'a mi'o
nolpratra
i o'u na
vajni i
je ba'e mi
pajni
sei la
fengu cu
cusku
le nu
do
se
catra
i lu do na jundi sei la smacu fi la alis cu junri cusku i do pensi ma li'u
i lu ienai ga'inai sei la alis toljgira cusku i do co'a cusku le mumoi
be lei kruvi pe'i li'u
i lu ije ge na go'i gi na cumki sei la smacu cu krixa co cladu jeke fengu
mutce li'u
i lu ui jgena li'u se cusku la alis noi roroi bredi le nu sidju
zi'e noi ru'u xanka catlu i lu ui e'ocai mi do sidju le nu luzgau jy li'u
i lu ai mi curmi no simsa sei la smacu cu cusku je sa'irbi'o je cliva i do
mi tolsi'a fau le nu do cusku lo tai nonselsmu li'u
i lu ainai go'i sei la alis uu pikca i ku'i fu'i je'u do selxaicni li'u
i la smacu cu spuda fi le nu cmoni po'o
i lu e'osai ko xruti klama gi'e mo'u cusku le lisri be fi do sei la alis
kixsku li'u i lei drata cu kansa co cusku lu go'i e'ocai li'u i ku'i
la smacu cu desygau po'o le stedu gi'enai depsarxe gi'e sutyze'a le ka
cadzu
i lu uu na stali li'u se xersku la cipnrlori cazi le nu mutce co
na'e se viska ije le tolci'o cakyjukni cu cabmoi cusku fi le tixnu be ri
fe lu ie doi dirba iu be mi i a'o ctuca do le nu do noroi fengu li'u
i lu ko na cusku doi mamta sei le citno cakyjukni cu cusku i do jai
banzu le nu fegygau lo'e xamsi cakcurnu li'u
i lu a'o la dinas vi zvati ju'ocai sei la alis fi no steci cu bacru cusku
i dy cazi cpacu da'i li'u
i lu la dinas ki'a va'o le nu mi zifre le nu te preti sei la cipnrlori
cu cusku li'u
i la alis cu djicni spuda ki'u le nu roroi bredi le nu tavla fi le
abu danlu i lu la dinas cu memi'amoi mlatu iji'a certu je'u le nu
kavbu loi smacu i ui au do viska dy ca le nu jersi loi cipni i je'u
dy lo'e cmalu cipni du'igi catlu gi citka li'u
i le di'u se cusku cu se jalge lo banli nu cinmo savru ra'i lei zvati
i lo cipni cu sutra le nu cliva ibo pa tolci'o cipnrpika co'a cliva brebi'o
gi'ecabo cusku lu eije'u mi zdakla i le nicte vacri na mapti le galxe
be mi li'u ije lo cipnrkanario cu nalsto voksa kixsku fi lei panzi
fe lu ko klama doi dirba i je'u ca tcika le nu ro do cu sipna bu'u le ckana li'u
i ki'u loi vrici le romei cu cliva ije la alis cu bazi kansa no da
i lu au mi na pu tavla fi la dinas sei abu sezysku co badri i no da
pe viku cu nelci dy pe'i i ku'i ju'o dy xagrai piro loi mlatu
pe le munje i oi doi dinas iu i'i xu mi do ba za'ure'u viska li'u
i caku la alis uu co'a za'ure'u klaku ki'u le nu abu cinmo
le ka mutce co nonkansa je badri ibazibo ku'i abu cu za'ure'u tirna
le nu vu stapa ije abu djicni galvi'a gi'e milxe co pacna le du'u
la smacu cu te sidbo fi lo drata gi'e xruti tezu'e le nu mo'u cusku
le lisri