La .alis. cizra je cinri zukte vi le selmacygu'e/papamo'o

by Lewis Caroll

←panomo'o

la .alis. cizra je cinri zukte vi le selmacygu'e by Lewis Caroll, translated by la .lojbangirz. papamo'o ma zerle'a lei rutytisna

paremo'o→

i la risna noltrunau e la risna noltruni'u cu zutse le vo'a nolstizu ca le nu abu joi cy tolcliva i lo barda so'imei cu jmaji le sruri i ro klesi be loi cmalu cipni joi danlu be'o e ji'a le karda romei i le nolse'u cu sanli ca'u le remei gi'e se rinju lo linsi gi'e jbini lo sonci remei noi fanta i jibni la noltrunau fa la blabi ractu noi jgari nu'i ge lo tabra lo xance gi lo skapi te ciska clanu le drata i satci midju le kumfa fa lo jubme noi se cpana lo barda palne be loi rutytisna noi tai xamgu se jvinu ja'e le nu la alis xagji ri'a le nu catlu i lu au mulgau le nunpai sei abu pensi gi'e fairgau le cidja li'u i ku'i la'e di'u simlu le ka na lakne i seki'ubo abu co'a catlu ro sruri be abu tezu'e le nu le temci cu culno

i la alis pu noroi zvati lo'e nunpai kumfa gi'e ku'i pu ca'a tcidu lo srana be ky loi cukta gi'e se pluka le nu facki le du'u djuno le du'u makau cmene so'a zvati i lu ta pajni sei abu sezysku ki'u le nu ta dasni lo barda krebasti li'u

i ta'o le pajni cu du la noltrunau noi dasni le nolmapku lo'e cpana be le krebasti to ko catlu le craxra va'o le nu do djica le nu viska le nu dasni ta'i makau toi gi'enaisai simlu le ka kufra i ju'o na melbi mapti

i lu ta pairkamni tsina sei la alis pensi i lei va pare danlu to ei abu cusku zo danlu ki'u le nu ge su'o dy mabru gi su'o dy cipni toi cu pairkamnycmi pe'i li'u i abu ji'iciroi cusku le romoi valsi gi'e jgira mutce ki'u le nu jinvi to drani toi le du'u so'usai cmalu nixli le me abu moi cu djuno le du'u makau smuni i ku'i zo paicmi ji'a mapti banzu

i ro le pare pairkamnycmi cu zuktce ciska fi lo tanbo i lu tu ma zukte sei la alis fi la cpicinfo cu tolylau cusku i tu ka'enai ciska da pu le nu le nunpai cu cfari li'u

i lu tu ciska le tu cmene sei la cpicinfo cu tolylau spuda ki'u le nu terpa lo'e nu tolmorji pu le fanmo be le nunpai li'u

i lu ue bebna sei la alis co'a cladu je fengu voksa cusku li'u i ku'i abu sutra sisti ki'u le nu la blabi ractu cu krixa lu ei smaji bu'u le kumfa li'u i la noltrunau co'a dasni le vistci gi'e xanka catlu le sruri tezu'e le nu facki le du'u makau tavla

i la alis ka'e viska to frili tai le nu da'i catlu ga'u le janco be py toi le nu ro le pairkamnycmi cu ciska lu ue bebna li'u le py tanbo kei gi'eji'asai ka'e tilvi'a le nu paboi py na se slabu lei lerfu pe zo bebna gi'e nitcu le nu cpedu le nu se jungau kei le lamji i lu ba melbi kalsa fa lei tanbo pu le nu le nunpai cu mulno sei la alis pensi li'u

i pa le pairkamnycmi cu pilno lo pinsi noi vrumli cupra i li'a la alis na ka'e renvi la'e di'u gi'e klama fo le sruri be le kumfa gi'e ti'erbi'o py gi'e bazi kakne le nu lebna le pinsi py i abu tai sutra ja'e le nu le selkecti ke cmalu pairkamnycmi no'u la bil po'u le rebyrespa na ka'e facki le du'u le pinsi makau binxo isemu'ibo by ba le nu ve'u sisku py ro sruri cu bilga le nu ciska sepi'o lo degji ze'a le djedi velvi'u i la'e di'u tolmutce le ka prali kei ki'u le nu noda seja'e barna le tanbo

i lu doi noisku ko tcidu le zerfuzyxu'a selsku sei la noltrunau cu cusku li'u

i caku la blabi ractu cu ciroi tolsakci le tabra gi'e tolgurgau le skapi te ciska slanu gi'e tcidu bacru di'e

           la noltruni'u pe le risna cu zbakukte loi rutytisna
                ze'a lo crisa djedi
           i le nolse'u pe le risna cu zerle'a loi rutytisna
                gi'e darbevri bredi

i lu ko pensi le do se paijdi sei la noltrunau fi le pairkamni cu cusku li'u

i lu ei za'o na go'i i ei za'o na go'i sei la ractu cu sutra zunti i ei lo mutce cu purci la'e di'u li'u

i lu ko klagau le pamoi zgana sei la noltrunau cu cusku li'u i la blabi ractu cu ciroi tolsakci le tabra gi'e krixa lu ju'i pamoi zgana li'u

i le pamoi zgana cu du la mapypre noi nerkla gi'e jgari nu'i ge lo tcati kabri le xance gi lo nanba joi matne le drata i lu ko mi fraxu doi nolba'i sei my co'a cusku le nu mi ti nerbevri i ku'i mi na mo'u pinxe le tcati ca le nu mi se klagau li'u

i lu ei do pu mo'u go'i sei la noltrunau cu cusku i ca ma do co'a go'i li'u

i la mapypre cu catlu la cibmasti cicyractu noi pu klaje'i my le kumfa gi'e

kansa la sipsmacu i lu le pavomoi be le cibmasti pe'i sei cy cusku li'u

i lu pamumoi sei la cibmasti cicyractu cu cusku li'u

i lu paxamoi sei la sipsmacu cu jmina li'u

i lu ko ciska la'e di'u sei la noltrunau fi le pairkamni cu cusku li'u i le pairkamni cu sutra ciska le ci detri le py tanbo gi'e sujykanji fi dy gi'e galfi le se kanji lo rupnu joi fepni

i lu ko vimcu le do mapku sei la noltrunau fi la mapypre cu cusku li'u

i lu ti na me mi moi sei la mapypre cu cusku li'u

i lu zerle'a sei la noltrunau fa'a le pairkamni cu ki'asku li'u i py zi notci'a le fatci

i lu mi ti vecnu sei la mapypre cu jmina ciksi i mi no ti ponse i mi mapypre li'u

i caku la noltruni'u co'a dasni le vistci gi'e co'a ze'a catlu la mapypre noi labybi'o gi'e xanka tarti

i lu ko dunda le do datni sei la noltrunau cu cusku i ko na xanka ija mi da do zivi catrymi'e li'u

i la'e di'u nasai simlu le ka darsygau le zgana noi za'o slilu fi le nu sanli fi lo jamfu ku fa'u le drata kei gi'e xanka catlu la noltruni'u gi'e se cfipu batyvi'u lo barda spisa le tcati kabri ne seba'i le nanba joi matne

i caku la alis ganse lo cizra noi cfipu abu co'u le nu facki le du'u makau fasnu i abu ca'o co'a za'ure'u barda banro gi'e pamai jdice le nu cliva le kumfa kei gi'e ku'i remai jdice le nu stali ze'a le nu le canlu cu banzu

i lu au do na tai catke sei la sipsmacu noi zutse lamji abu cu cusku i mi ka'eru'e vasxu li'u

i lu mi ka'enai rivbi sei la alis cumla cusku i mi ca'o banro li'u

i lu ei do na vi banro sei la sipsmacu cu cusku li'u

i lu ko na bebna tavla sei la alis darsyze'a cusku i ju'o do ji'a ca'o banro li'u

i lu go'i i ku'i mi banro sekai lo ka racli sutra sei la sipsmacu cu cusku i na tai ckasu go'i li'u i sy tolgei mutce sa'irbi'o gi'e pagre le kumfa le drata fanmo

i ze'a la'e di'u la noltruni'u noroi sisti le nu catlu la mapypre kei gi'e cusku ca le nu la sipsmacu cu pagre le kumfa kei fi pa le nunpai pulji lu ko bevri le liste be lei sanga pe le romoi ke zgike se tigni li'u i la mapypre cu tai desku ja'e le nu le re cutci cu nalseldasybi'o

i lu ko dunda le do datni sei la noltrunau rere'u fengu cusku ija do te catrymi'e gi'u xanka li'u

i lu mi pindi doi nolba'i sei la mapypre cu co'a desku voksa cusku i mi puzi co'a pinxe le mi tcati to zi lo jetfu be li ji'isu'epa toi i le nanba joi matne ca'o cinlyze'a i le tcati cu tergu'i li'u

i lu le mo cu tergu'i sei la noltrunau cu cusku li'u

i lu ty pamoi lei go'i sei la mapypre cu spuda li'u

i lu li'a ty pamoi zo tergu'i sei la noltrunau cu kinli cusku i xu do jinvi le du'u mi bebna i e'e di'a co'e li'u

i lu mi pindi sei le mapypre cu di'a co'e i so'eda cu tergu'i ba la'e di'u i ku'i la cibmasti cicyractu cu cusku li'u

i lu mi na go'i sei la cibmasti cicyractu cu sutra zunti li'u

i lu do ja'a go'i sei la mapypre cu cusku li'u

i lu mi tolxu'a sei la cibmasti cicyractu cu cusku li'u

i lu ta tolxu'a sei la noltrunau cu cusku i ko tolju'i le di'u pagbu li'u

i lu no'i la sipsmacu cu cusku sei la mapypre cu di'a co'e li'u i my xanka ke sruri catlu tezu'e le nu zgana le nu xukau sy ji'a tolxu'a i ku'i sy tolxu'a noda gi'e carmi sipna

i lu baku sei la mapypre cu di'a cusku mi za'ure'u katna lo nanba joi matne li'u

i lu ku'i la sipsmacu ma cusku sei pa le pairkamnycmi cu te preti li'u

i lu mi ri na morji sei la mapypre cu cusku li'u

i lu ei do morji sei la noltrunau cu notsku ija mi da do catrymi'e li'u

i la mapypre noi dunku mutce cu falcru le tcati kabri e le nanba joi matne gi'e sanli fi pa le cidni i lu mi pindi doi nolba'i sei my co'a co'e li'u

i lu do pindi le ka tavla certu sei la noltrunau cu cusku li'u

i caku pa le smacrkobaiu cu geirki'a gi'e bazi se rinju lei nunpai pulji to zo rinju cu rufsu valsi i mi ciksi le nu ta'i makau zukte i py ponse lo barda ke bukpu dakli noi ka'e ganlo sepi'o loi dasri i py le smacrkobaiu cu setca dy gi'e zutse toi

i lu mi gleki le nu mi viska la'e di'u sei la alis pensi i mi so'iroi tcidu fi loi karni ca le mo'u nunpai lu troci le nu xanvruzau noi bazi se rinju lei nunpai pulji li'u gi'e pu noroi jimpe le du'u makau smuni li'u

i lu e'a do va'o le nu la'e di'u cu pirosi'e le do se djuno be fi le cuntu cu nitkla sei la noltrunau cu di'a cusku li'u

i lu mi ka'enai klama lo nitmau sei la mapypre cu cusku i mi cpana le loldi li'u

i e'a va'o la'e di'u do nitytse sei la noltrunau cu spuda li'u

i caku le drata smacrkobaiu cu geirki'a gi'e se rinju

i lu a'u mo'u smacrkobaiu sei la alis pensi i caku mi'a xagmau li'u

i lu mi zmanei le nu mo'u tcati pinxe sei la mapypre cu cusku li'u i my xanka catlu la noltruni'u noi tcidu le liste be lei sanga

i lu e'a klama sei la noltrunau cusku li'u i la mapypre cu sutra cliva le kumfa secau le nu denpa ji'asai le nu dasni lei cutci

i lu ije ko le stedu tu vimcu bu'u le bartu sei la noltruni'u fi pa le pulji cu jmina cusku li'u i ku'i la mapypre na ka'e se viska pu le nu le pulji cu tolcliva le vorme

i lu ko klagau le jersi zgana sei la noltrunau cu cusku li'u

i le jersi zgana cu du le jukpa pe la noltroni'u i jy jgari le tsaprpiperi tanxe le xance i la alis cu smadi le du'u du makau kei pu le nu jy klama le kumfa kei ki'u le nu ro le prenu poi jibni le vorme cu co'a senci

i lu ko dunda le do datni sei la noltrunau cu cusku li'u

i lu na go'i sei le jukpa cu cusku li'u

i la noltrunau cu xanka catlu la blabi ractu noi tolylau voksa cusku lu ei le nolba'i cu kuclanli le vi zgana li'u

i lu i'a o'o i'a sei la noltrunau cu tolgleki li'u i ny ba le nu kucysimgau lei birka gi'e frumu fa'a le jukpa co'u le nu le ny kanla cu jibni le nu na ka'e se viska cu condi voksa cusku lu ma te zbasu lo'e rutytisna li'u

i lu lo'e tsaprpiperi ra'u sei le jukpa cu cusku li'u

i lu lo'e satyjisra sei lo sipna voksa noi trixe jy cu cusku li'u

i lu ko selkarlygau la va sipsmacu sei la noltruni'u cu krixa i ko le stedu ta vimcu i ko ta barklagau le kumfa i ko ta rinju i ko ta tunta i ko le zbikre cu vimcu li'u

i ze'a lo mentu be li so'o le kumfa cu kalsa ca'o le nu le sipsmacu gau barkla i ca le nu cnici xruti kei le jukpa ba'o canci

i lu na vajni sei la noltrunau cu surla mutce cusku i ko klagau le jersi zgana li'u i ny tolylau tonga jmina cusku fi la noltruni'u fe lu i'u doi dirba ei ba'e do kuclanli le jersi zgana i le nu go'i cu mutce corgau mi le sedycra li'u

i la alis cu catlu la blabi ractu noi juxre co'e le liste ku'o gi'e mutce kucli le du'u le jersi zgana cu mokau i lu za'o na mutce le ka datni sei abu sezysku li'u i uedaisai la blabi ractu sepi'o le kinli je cmalu voksa cu bacru tcidu le cmene po'u zo alis