La .alis. cizra je cinri zukte vi le selmacygu'e/panomo'o
| ←somo'o | la .alis. cizra je cinri zukte vi le selmacygu'e by , translated by la .lojbangirz. panomo'o xasyjukni vonseldansu |
papamo'o→ |
i la jitfa cakyrespa cu condi vruvasxu gi'e mosra le trixe be pa le limna'i
lei kanla gi'e catlu la alis gi'e troci le nu tavla i ku'i ze'a lo mentu be
li ji'ire loi nu vruvasxu cu dicra le voksa i lu mintu lo'e nu lo bongu
cu zunti le galxe sei la cpicinfo cu cusku li'u i cy co'a gunka le nu
desygau gi'e darxi fo le trixe ibazabo la jitfa cakyrespa cu xruti le ka
se voksa kei gi'e di'a selklaku flira cusku
lu ju'ocu'i do na ze'u xabju le xamsi cnita tosa'a lu mi na go'i sei la alis cusku li'u toi i ju'ocu'i do noroi penmi lo xasyjukni tosa'a la alis co'a cusku lu mi paroi vu'irga'e li'u gi'e ku'i sutra sezydicra gi'e cusku lu noroi go'i li'u toi iseki'ubo do na ka'e se xanri le nu lo'e xasyjukni vonseldansu cu mokau kukte li'u
i lu ie na go'i sei la alis cusku i ri mo seldansu li'u
i lu ta'a do'u sei la cpicinfo cu cusku i pamai lei dansu pada se linji pa'a
le xamsi korbi li'u
i lu ba'e reda sei la jitfa cakyrespa cu krixa i lo'e pinpedi ku ce'o
lo'e cakyrespa ku ce'o lo'e salmone ku ce'o da si'a li'o ibabo ba le nu
mo'u vimcu ro mivjau le jvinu li'u
i lu la'e di'u ta'e ze'u co'e sei la cpicinfo cu zunti li'u
i lu e'e reroi crakla li'u
i lu roda kansa lo xasyjukni sei la cpicinfo cu krixa li'u
i lu li'a sei la jitfa cakyrespa cu cusku i e'e reroi crakla i e'e
penmi le kansa li'u
i lu e'e cajysi'u lei xasyjukni i e'e xruti po'i le mintu sei la cpicinfo
cu di'a co'e li'u
i lu babo ju'i do'u sei la jitfa cakyrespa di'a cusku i e'e renro li'u
i lu fe lei xasyjukni sei la cpicinfo noi plipe le vacri cu krixa li'u
i lu fi le xamsi serai le selka'e ka darno li'u
i lu e'e limna jersi lei xasyjukni sei la cpicinfo cu krixa li'u
i lu e'e pipcarna ne'i le xamsi sei la jitfa cakyrespa cu krixa li'u
i lu e'e za'ure'u cajysi'u lei xasyjukni sei la cpicinfo cu voksa cladu traji
krixa li'u
i lu e'e xruti le tumla i mo'u pamoi morna sei la jitfa cakyrespa noi suksa
jdikygau le voksa cu cusku li'u i le re danlu noi pu ru'u plipe ze'a la'e di'u
tai lo'e nu fenki cu badri je smaji tsebi'o gi'e catlu la alis
i lu ju'oda'i melbi seldansu sei la alis toldarsi cusku li'u
i lu a'upei do viska lo mupli sei la jitfa cakyrespa cu cusku li'u
i lu a'usai go'i sei la alis cusku li'u
i lu e'e mi'o troci le nu pamoi morna sei la jitfa cakyrespa fi la cpicinfo
cu cusku i mi'o se'a kakne secau lo'e xasyjukni i ma sanga li'u
i lu i'e ba'e do go'i sei la cpicinfo cu cusku i mi tolmorji lei valsi li'u
i co'a junri dansu ru'u la alis i ru'inai stapa lei abu jmadegji ca le nu
dukse jbikla i sligau lei xance tezu'e le nu sinxa le rilti ize'abo
la jitfa cakyrespa cu masno je badri mutce sanga lu
e'o sutra doi cakcurnu i ko ti'a zgana ua pa
xajyfi'e noi jbitrixe gi'e me mi rebla stapa
i ui a'a ro le jukni e le respa ca se ganse
gi'e denpa mi le canre i pei do ba kansa dansu
i aipei naipei aipei naipei aipei do ba dansu
i aipei naipei aipei naipei naipei do ba dansu
i do ka'enai se xanri le nu pluka co mokau
ca le nu mi'o se renro fi le xamsi i'a au
i dardukse i dardukse sei cy spuda tolselmansa
doi merlanu ki'e ku'i i mi na ba kansa dansu
i ainai einai ainai einai ainai mi ba dansu
i ainai einai ainai einai einai mi ba dansu
i na selvai le ni darno sei le pendo ze'i frati
i iasai lo drata korbi ca'a drata mlana zvati
i le ni darno le glico cu ni jibni be la frans
i ko carna doi cakcurnu i ei do ba kansa dansu
i aipei naipei aipei naipei aipei do ba dansu
i aipei naipei aipei naipei naipei do ba dansu
li'u i lu ki'e i le nu dansu zo'u mutce cinri fa le nu catlu sei
la alis noi mutce gleki le nu uo mulno cu cusku i mi ja'asai nelci
le cinri selsanga be sera'a lo'e merlanu li'u
i lu a'a lo'e merlanu zo'u sei la jitfa cakyrespa cu cusku do
my pu ca'a viska li'apei li'u
i lu go'i sei la alis cusku i mi my so'iroi viska vi le sairpaln-
sei abu sutra sezydicra li'u
i lu mi na djuno le du'u makau stuzi la sairpaln sei la jitfa cakyrespa
cu cusku i ku'i do va'o le nu tai so'iroi viska my cu se slabu li'a
le nu makau my jvinu li'u
i lu ia sei la alis pensi spuda le my rebla cu nenri le my moklu i my
cpana lo'e nabyspi li'u
i lu do srera tu'a lo'e nabyspi sei la jitfa cakyrespa cu cusku i lo'e
nabyspi cu se jisybi'o va'o lo'e nu jinru le xamsi i ku'i le my rebla
ja'a nenri le my moklu i la'e di'u se krinu sei caku la jitfa cakyrespa
cu sipfru ke kanla ga'orgau i ko ta tavla le krinu e ro srana sei
fi la cpicinfo cu cusku li'u
i lu se krinu sei la cpicinfo cu cusku le nu my ba'e ja'a kansa lo'e
xasyjiknu le nu dansu i seki'ubo my se renro fi le xamsi i seki'ubo my
farlu lo darno i seki'ubo my carmi setca le rebla le moklu i seki'ubo my
ka'enai tolsetca i uo li'u
i lu ki'e sei la alis cusku i cinri mutce i mi pu noroi djuno lo tai
mutce lo'e merlanu li'u
i lu do'a mi do ka'e tavla lo se jmina sei la cpicinfo cu cusku i xu
do djuno le du'u makau krinu le nu zo labyfi'e cmene lo'e merlanu li'u
i lu mi la'e di'u noroi pensi sei la alis cusku i ma krinu li'u
i lu my kurji lo'e jufra e lo'e selsku sei la cpicinfo cu junri spuda li'u
i la alis mulno le ka se cfipu i lu uanai kurji lo'e jufra e lo'e selsku
sei abu preti tonga rapsku li'u
i lu a'a do ma pilno le nu kurji lo'e do selsku sei la cpicinfo cu cusku
i va'i ma cipra le ka gendra li'u
i la alis ze'a pensi pu le nu danfu i lu la jbofi'e cu go'i pe'i li'u
i lu ie la lobyfi'e va'inai i le genra ni'a le xamsi sei la cpicinfo cu
di'a condi voksa cusku cu se cipra lo labyfi'e i ka'udai li'u
i lu mi romu'ei le du'u mi merlanu cu cusku sei la alis noi za'o pensi
le selsanga cu cusku fi le xajyfi'e fe lu fi'inai do'u e'o
darsta i mi'a na djica le nu do mi'a kansa li'u li'u
i lu bilga le nu xy kansa sei la jitfa cakyrespa cu cusku i no clite
finpe cu rivbi lo xajyfi'e li'u
i lu ue je'upei sei la alis spaji mutce tonga cusku li'u
i lu li'a go'i sei la jitfa cakyrespa cu cusku i mu'a va'o le nu lo
finpe cu te preti fo mi kei mi cusku lu do ma friti le do xajyfi'e
li'u li'u
i lu xu do skudji zo xasyvi'e sei la alis cusku li'u
i lu mi skudji lo'e se cusku be mi sei la jitfa cakyrespa cu jgicro
tonga spuda li'u i la cpicinfo cu minsku lu e'e do mi'a tavla su'o
le do selfri li'u
i lu mi do ka'e tavla le mi selfri pe co'a le zi cerni sei la alis
toldarsi milxe cusku i ku'i na prali fi le nu peixru le purlamdei
i ki'ubo mi drata prenu ca py li'u
i lu ko ciksi piro la'e di'u sei la jitfa cakyrespa cu cusku li'u
i lu o'onai na go'i i pamai lo'e selfri sei la cpicinfo cu sutydji
tonga cusku i lo'e velcki cu ze'u oi co'e li'u
i la alis co'a tavla fi lei abu selfri pe co'a le nu pare'u viska
la blabi ractu i abu milxe le ka xanka la'e di'u kei ca le cfari
i le re danlu abu mutce jibni gi'e mlana i dy ganra mutce kargau lei
kanla e le moklu i ku'i abu zenba le ka darsi ca le nu ca'o co'e i
lei se tirna cu prane smaji co'u le nu abu pencu le pagbu pe sera'a
le nu abu sitsku lu do tolcitno doi paf uiliam li'u la ciftoldi
fau le nu lei valsi cu fricybi'o icaku la jitfa cakyrespa cu ze'u
sakyvasxu gi'e cusku lu la'e di'u mutce le ka cizra li'u
i lu traji le ka cizra fo lei cizra sei la cpicinfo cu cusku li'u
i lu roda fricybi'o sei la jitfa cakyrespa rere'u pensi cusku i mi
djica le nu tirna le nu ta ca troci le nu sitsku da i ko ta skumi'e
le nu co'a co'e li'u i jycy catlu la cpicinfo tai le nu jinvi le du'u
cy catni la alis
i lu ko sa'irbi'o gi'e sitsku lu lazni se voksa li'u sei
la cpicinfo cu cusku li'u
i lu ue lei danlu cu mutce minde gi'e gasnu le nu sitsku loi selcli
sei la alis pensi i dunli lo'e nu mi ve ckule li'u i ku'i abu sa'irbi'o gi'e
co'a sitsku i ku'i le abu menli cu culno le xasyjukni vonseldansu
ja'e le nu abu ja'aru'e djuno le du'u abu cusku makau i lei valsi
ca'a cizra mutce barkla i lu
xasyjukni se voksa i cusku ia ti'e
lu do mi za'o jukpa i ei gau kresi'e
li'u gi'e zbipilno le nu vo'a cnici
le ka dasri joi batke e ro si'a vrici
i ca le nu le canre cu sudga ku cmila
gi'e tavla co ckasu brafi'e se cfila
i ii ku'i ca le nu le xamsi cu banro
kei le voksa cu binxo lo sance tolkanro
i lu di'u frica le ta'e se cusku be mi bei ca le nu mi verba sei
la cpicinfo cu cusku li'u
i lu ju'a mi di'u pu noroi tirna sei la jitfa cakyrespa cu cusku i ku'i simlu le ka
nalfadni nonselsmu li'u
i la alis noda cusku i abu ca'o zutse to le flira cu se sarju le xance toi
gi'e kucli le du'u xukau ca de ba za'ure'u rarna fasnu
i lu mi djica le nu ciksi fi mi sei la jitfa cakyrespa cu cusku li'u
i lu ta ka'enai ciksi sei la cpicinfo cu sutra cusku i e'e di'a co'e
le jersi pempau li'u
i lu ku'i lei batke xu sei la jitfa cakyrespa cu za'o co'e i ta'i ba'e ma
pilno le nazbi le nu cnici li'u
i lu pamoi be lei nundansu stapa sei la alis cusku li'u i ku'i abu mutce
se cfipu piro le cuntu gi'e djica le nu le selsnu cu cenba
i lu e'e di'a co'e le jersi pempau sei la cpicinfo rere'u naldenpa cusku
i co'a co'e lu mi pagre le purdi li'u li'u
i la alis na darsi le nu na tinbe i abu birti le du'u ba srera barkla
gi'e di'a desku voksa cusku lu
mi pagre le purdi i i'e se funjdi
i le ctecpi le tirxu vi kansa lo nuncti
i ty le se snuji e ia le te snuji
cu citka ca le nu cy cpacu le smuci
i ba le nu mulno uo kei cy te dunda
le palta noi ke'a cy ka'e se tunta
i ca le nuncabna le tirxu cu brejbi
le nu pilno le dakfu --
i lu ma prali fi le nu sitsku ro di'u sei la jitfa cakyrespa cu zunti
va'o le nu do na ca'o ciksi i traji le ka cfipu kei fo lei mi se tirna li'u
i lu go'i i pe'i ei sisti sei la cpicinfo cu cusku li'u i la alis mutce
le ka gleki le nu tai zukte
i lu e'upei mi'a troci lo drata morna be fi le xasyjukni vonseldansu
sei la cpicinfo cu di'a cusku iji aupei la jitfa cakyrespa cu sanga da
do li'u
i lu a'e e'o sanga pe'u doi jitfa cakyrespa sei la alis spuda li'u
i le nu abu tai sutra spuda cu rinka le nu la cpicinfo cu cusku sepi'o
lo jgicro tonga lu i'a ka'enai jimpe le nu makau pluka i ko sanga
lu cakyrespa stasu li'u ta vau aipei doi slabu li'u
i la jitfa cakyrespa cu condi vruvasxu gi'e co'a sanga di'e sepi'o lo
voksa noi so'oroi dicra
melbi bo stasu ricfu je crino
denpa fi lo vaurcnino
i pronalka'e kukselzbasu
stasu co vanci melbi bo stasu
stasu co vanci melbi bo stasu
me--elbi bo sta--asu
me--elbi bo sta--asu
sta--asu co va--a--anci
melbi bo melbi bo stasu
melbi bo stasu i roda kecti
le re'ucti ja fi'ecti
i no da xanka le nu ckasu
da le nu djica le melbi bo stasu
da le nu djica le melbi bo stasu
me--elbi bo sta--asu
me--elbi bo sta--asu
sta--asu co va--a--anci
melbi bo melbi -- BO STAsu
i lu e'e rapli sei la cpicinfo cu krixa li'u i la jitfa cakyrespa
puzi co'a rere'u sanga ca le nu lo selkrixa no'u lu le nunpai cu
cfari li'u darno se tirna
i lu e'e sei la cpicinfo cu krixa li'u i cy jgari la alis fo le xance
gi'e sutra cliva gi'e na denpa le nu mo'u sanga
i lu le nunpai cu mo sei la alis vaxyselnandu cusku ca le nu bajra i
ku'i la cpicinfo cu spuda lu e'e li'u po'o gi'e sutyze'a bajra ca'o
le nu bleze'a to se bevri le brife poi jersi vo'a toi fa lei badri
valsi po'u di'e
sta--asu co va--a--anci
melbi bo melbi bo stasu