L traditor de fech
L traditor de fech
Na uta volea i trevijegn vegnir ite per Contrin a ge sutar ados ai fascegn e par robar bestiam e bele touse. Fascegn n'era pec che jìa de contra, parché l'assaut é stat de not e da nascousc. Ma i fascegn à troa n bel post da se parar dai nemisc e tant strent, che nience na soricia podea passar zenza esser veduda. I trevijegn volea jà se n jir a ciasa. Ma un, che é stat n bel pez te Fascia e che saea inout, l i à mené sun troes e viai che saea demò i caciadores, per monc e per val fin che i é rué da dedò dai fascegn. Chisc a veder chela fola de nemisc no i saea che dir ne che far ne che sènt chiamar. I se à trat n jeneion e i à preà sent'Uliana che la ge deide. E, o miràcol! Candenó l'era la sènta jà chiò e l'à copà co la spada l traditor, che é sutá mort per tera e l se à brujà e dapò é sciampá na fiama per Vael. A veder chist miràcol i trevijegn i ciapà na fufa tant grana che i é sciampé, e che egn e egn no se à più sentù nia de ic. Zacan se vedea amò ta Contrin na lum sgolan stroz. L'era l'àmena de chel maladet.